НАТО собиқ бош котиби Андерс Фог Расмуссен альянсни Украинага ёзма хавфсизлик кафолатларини тақдим этишга ва унинг ҳеч қандай шартларсиз НАТОга аъзо бўлиши учун йўл харитасини белгилашга чақирди. Акс ҳолда, НАТОга аъзо айрим давлатлар Украинага қўшин юбориши мумкин, деб Расмуссеннинг сўзларини келтирди The Guardian.
Фог Расмуссеннинг фикрича, хавфсизлик кафолатлари разведка маълумотларини алмашиш, Украина билан қўшма машғулотлар, ўқ-дорилар ишлаб чиқаришни кўпайтириш ва Россияни келажакдаги эҳтимолий ҳужумлардан тийиб туриш учун Киевга етарли қурол етказиб беришни ўз ичига олиши керак. Сўнгги пайтларда бу ҳақда тез-тез гапирилмоқда, деди НАТО собиқ бош котиби Франциянинг худди шундай чақириғини назарда тутиб.
Шу билан бирга, Фог Расмуссен хавфсизлик кафолатларининг ўзи етарли бўлмаслигини таъкидлади. “НАТО иттифоқчиларидан айримлар Украинанинг аъзоликка интилиши борасидаги муҳокамадан қочиш учун хавфсизлик кафолатларини ёқлаб чиқиши мумкин. Улар хавфсизлик кафолатларини тақдим этиш орқали альянсга аъзолик масаласини четлаб ўтишга умид қилмоқда. Менимча, бу имконсиз”, — деди у. Сиёсатчи Шарқий ва Марказий Европа давлатлари, айниқса, Украинанинг НАТОга олиб борадиган йўли муҳокамасини талаб қилаётганини эслатди.
Фог Расмуссен Польшанинг Украинага ёрдамини қайд этиб, “Агар НАТО Украина учун аниқ йўл масаласида келиша олмаса, баъзи давлатлар алоҳида чора кўриши мумкинлиги”дан огоҳлантирди.
“Мен бу контекстда Польша миллий даражада фаолроқ ҳаракат қилишини ва Болтиқбўйи мамлакатлари (Украинага) қўшин юбориш имкониятини ўрганаётганини истисно қилмайман”, — деди НАТО собиқ раҳбари. Унинг сўзларига кўра, Украинанинг бундай ҳарбий ёрдам сўраши мутлақо қонуний бўлади.
Изоҳ (0)