Александр Лукашенко Беларусь суди томонидан олти йиллик қамоқ жазосига ҳукм қилинган россиялик Софя Сапегани афв этди. Бу ҳақда “Белта” агентлиги хабар бермоқда.
Хабарда айтилишича, Сапега 7 июнь куни губернатор Олег Кожемяко бошчилигидаги Приморск ўлкаси (Сапега Владивостокда туғилган) делегациясига топширилган.
Кожемяко ўзининг Telegram-каналида Сапега “янгидан ҳаёт бошлаш имкониятига эга бўлганини” ёзди. Унга кўра, Лукашенко Кожемяконинг мурожаатидан сўнг Сапегани афв этган.
“У Софя ота-онасининг шафқат ҳақидаги илтимосига оталардек муносабатда бўлди. Улар қардош давлат раҳбаридан қизини шахсан топширишни сўраганди. Ишончим комилки, Софя бу воқеадан хулоса чиқаради. Бу жиддий дарс бўлди. Аммо Александр Григоревичнинг хайрихоҳлиги туфайли у олти йил ўрнига икки йил қамоқда ўтирди. Ёшларнинг хатолари ўтмишда қолсин, олдинда янги ҳаёт кутяпти”, — деди губернатор.
Кожемяконинг каналида эълон қилинган видеода Сапега “оиламни яна кўриш, уйга қайтиш имконияти учун Лукашенкодан миннатдорман” деб айтади.
Софя Сапеганинг ҳибсга олиниши
Софя Сапега 2021 йил май ойида Рянаир авиакомпаниясининг Афинадан Вилнюсга учаётган рейси Минскка мажбуран қўндирилганидан сўнг мухолифатчи Nexta Telegram каналининг собиқ бош муҳаррири Роман Протасевич билан бирга қўлга олинган эди. 2022 йил май ойида у ижтимоий нафратни қўзғатиш ва шахсий маълумотларни ноқонуний йиғиш бўйича моддалар билан олти йиллик қамоқ жазосига ҳукм қилинди. Терговчиларнинг сўзларига кўра, у Беларусь хавфсизлик ходимларининг шахсий маълумотларини эълон қилган “Беларусь қора китоби” Telegram каналини бошқарган. 2022 йил июнь ойида Сапега Александр Лукашенкодан афв сўради, аммо рад жавобини олди.
2023 йилнинг май ойи охирида Беларусда Роман Протасевич ҳам афв этилгани ҳақида хабар берилди. Минск суди Протасевични саккиз йилга озодликдан маҳрум қилганди. У давлат ҳокимиятини тортиб олишга оммавий даъват қилиш, террорчилик ҳаракатлари, президентни ҳақорат қилиш, Беларусь ҳақида атайлаб ёлғон маълумот тарқатиш ва бошқа жиноятларда айбдор деб топилганди. Протасевич Беларусь Жиноят кодексининг 11-моддаси бўйича айбланган.
Изоҳ (0)