Канадада давом этаётган кенг кўламли ўрмон ёнғинлари туфайли АҚШнинг бир қанча шаҳарлари, жумладан, Нью-Йорк қуюқ тутун билан қопланди. Шаҳар аҳолисига ниқоб тақиш тавсия этилмоқда, деб хабар берди The Wall Street Journal.
Ижтимоий тармоқларда тутун туфайли ҳатто осмонўпар бинолар кўринмай қолгани акс этган видеолар тарқалмоқда.
Нью-Йорк дунёдаги ҳаво сифати энг ёмон шаҳарлар рейтингида иккинчи ўринга чиқди. Шаҳар мери Эрик Адамс аҳолини имкон қадар ташқарига чиқмасликка чақирди. Мактабларнинг очиқ ҳавода ўтиладиган дарслари бекор қилинди. Одамларга ниқоб тақиш тавсия этилади. Шунингдек, ОАВ маълумотларига кўра, Нью-Йоркнинг La-Guardia аэропортига йўналган баъзи рейслар ва аэропортнинг Нью-Жерсига учадиган рейслари тўхтатилган.
Метеорологларнинг баҳосига кўра, АҚШ шаҳарлардаги ҳаво сифати ҳафта охиригача яхшиланиши керак.
2023 йил бошидан бери Канаданинг Квебек провинциясида 400 дан ортиқ ўрмон ёнғинлари аниқланган, бу одатдагидан икки баробар кўп. Йил бошидан бери Канада бўйлаб 3,6 миллион гектар ўрмонлар вайрон бўлган, шундан 200 минг гектардан ортиғи Квебекда. Айни пайтда провинцияда 160 дан ортиқ ўрмон ёнғинлари фаол бўлиб, улардан 100 дан ортиғи ҳали ҳам бартараф этилмаган.
Ёнғин тутуни Канада ва АҚШнинг шарқий қирғоқлари бўйлаб тарқалмоқда. Ҳавонинг ифлосланиши ҳақида огоҳлантиришлар Нью-Йорк ва Коннектикутда эълон қилинган, Пенсилвания, Вермонт ва Нью-Жерси штатларида ифлосланиш даражаси “заиф аҳоли учун хавфли”. Канададаги ўрмон ёнғинлари тутуни Миннесота, Висконсин, Иллинойс, Оҳайо, Индиана ва Кентукки ва Виржиния штатларининг бир қисмида ҳам ҳаво сифатини пасайтирган.
Изоҳ (0)