Бирлашган Миллатлар Ташкилоти ва Қизил Хоч ходимлари Каховка ГЭСнинг портлатилиши оқибатида сув босган Херсон вилоятида бўлиши керак, бироқ улар йўқ. Бу ҳақда Украина президенти Владимир Зеленский Bild нашрига берган интервьюсида айтиб ўтди.
Украина президентининг айтишича, БМТ ва Қизил Хоч “инсонлар ҳаётини сақлаб қолиш учун биринчилардан бўлиб фалокат жойида бўлиши керак”. Зеленский ушбу ташкилотларнинг Украинанинг ёрдам ҳақида сўровларига муносабатидан ҳафсаласи пир бўлганини таъкидлади.
“Жавоб олмадик. Мен ҳайратдаман”, — деди Украина президенти ва агар реакция бўлганида, бу жуда дипломатик бўлар эди, деб таъкидлади.
“Ҳозир содир бўлаётган воқеалар — фожиа. Экологик фалокат ва инсоният ҳалокати. Одамлар ва ҳайвонлар ҳалок бўлди. Сув босган уйларнинг томида туриб одамлар сувда оқиб кетаётганларни кўряпти. Бунга бошқа томондан қараш мумкин. Херсон вилоятининг босиб олинган қисмидан одамларни олиб чиқиш жуда қийин”, — дея қўшимча қилди Зеленский.
Каховка ГЭС тўғони 6 июнь куни эрталаб бузилгач, Херсон вилоятидаги беш мингга яқин турар жой биноси сув остида қолди. Украина расмийлари Россия ҳарбийлари тўғонни портлатганини даъво қилмоқда. Кремлнинг таъкидлашича, тўғон “Украина қуролли тузилмаларининг жиноий ҳаракатлари оқибатида” вайрон қилинган.
Изоҳ (0)