Каховка ГЭС вайрон бўлишининг энг катта сабаби бу структуранинг ичкаридан бузилишидир. Бу ҳақда муҳандислар ва ўқ-дорилар бўйича мутахассисларнинг баҳоларига таяниб, The New York Times хабар берди.
Прогнозларга кўра, ракета ҳужуми бунчалик катта зарар келтириши мумкин эмас. Чекланган маконда портлаш пайтида энергия ички тузилмаларга ўтиб, жиддий зарар етказади. Шунга қарамай, мутахассислар бунинг учун юзлаб килограмм портловчи моддалар кераклигини илгари сурди.
“Бомба ёки ракетанинг ташқи портлаши тўғонга фақат кичик зарар келтирган бўларди. Бундай ҳалокатли таъсирга эришиш учун бир неча марта кўпроқ портловчи моддалар керак”, — дейди Иллинойс университетининг муҳандислик профессори ва портловчи моддалар бўйича эксперти Ник Глумак.
Украинада уруш бошланганидан бери Каховка ГЭС бир неча бор ўққа тутилган, томонлар бунда бир-бирини айблаган.
“Тўғонга етказилган зарар унинг қулаши учун етарли бўлганми ёки йўқми, ҳозирча аниқ эмас”, — хулоса қилди экспертлар.
Каховка ГЭС портлатилиши
6 июнь куни Херсон вилоятининг Россия томонидан вақтинча босиб олинган қисмида Каховка ГЭСнинг тўғони портлатилди. Сув Днепрнинг қуйи оқимига назоратсиз равишда оқизилган. Украина ва Россия бир-бирини ГЭСни вайрон қилишда айблади. Сув тошқинлари хавфи остида қолган ҳудудлардан аҳоли эвакуация қилинмоқда.
Владимир Зеленскийнинг сўзларига кўра, станциянинг вайрон бўлиши оқибатида 80 га яқин шаҳар ва қишлоқлар “сув остида” қолган, уларда Россиянинг кенг кўламли босқинидан олдин камида 100 минг киши яшаган. Қрим ва Запорожье атом электр станциясига сув танқислиги таҳдид солаётгани айтилмоқда.
Изоҳ (0)