Aleksandr Lukashenko Belarus sudi tomonidan olti yillik qamoq jazosiga hukm qilingan rossiyalik Sofya Sapegani afv etdi. Bu haqda “Belta” agentligi xabar bermoqda.
Xabarda aytilishicha, Sapega 7-iyun kuni gubernator Oleg Kojemyako boshchiligidagi Primorsk o‘lkasi (Sapega Vladivostokda tug‘ilgan) delegatsiyasiga topshirilgan.
Kojemyako o‘zining Telegram-kanalida Sapega “yangidan hayot boshlash imkoniyatiga ega bo‘lganini” yozdi. Unga ko‘ra, Lukashenko Kojemyakoning murojaatidan so‘ng Sapegani afv etgan.
“U Sofya ota-onasining shafqat haqidagi iltimosiga otalardek munosabatda bo‘ldi. Ular qardosh davlat rahbaridan qizini shaxsan topshirishni so‘ragandi. Ishonchim komilki, Sofya bu voqeadan xulosa chiqaradi. Bu jiddiy dars bo‘ldi. Ammo Aleksandr Grigoryevichning xayrixohligi tufayli u olti yil o‘rniga ikki yil qamoqda o‘tirdi. Yoshlarning xatolari o‘tmishda qolsin, oldinda yangi hayot kutyapti”, — dedi gubernator.
Kojemyakoning kanalida e’lon qilingan videoda Sapega “oilamni yana ko‘rish, uyga qaytish imkoniyati uchun Lukashenkodan minnatdorman” deb aytadi.
Sofya Sapeganing hibsga olinishi
Sofya Sapega 2021-yil may oyida Ryanair aviakompaniyasining Afinadan Vilnyusga uchayotgan reysi Minskka majburan qo‘ndirilganidan so‘ng muxolifatchi Nexta Telegram kanalining sobiq bosh muharriri Roman Protasevich bilan birga qo‘lga olingan edi. 2022-yil may oyida u ijtimoiy nafratni qo‘zg‘atish va shaxsiy ma’lumotlarni noqonuniy yig‘ish bo‘yicha moddalar bilan olti yillik qamoq jazosiga hukm qilindi. Tergovchilarning so‘zlariga ko‘ra, u Belarus xavfsizlik xodimlarining shaxsiy ma’lumotlarini e’lon qilgan “Belarus qora kitobi” Telegram kanalini boshqargan. 2022-yil iyun oyida Sapega Aleksandr Lukashenkodan afv so‘radi, ammo rad javobini oldi.
2023-yilning may oyi oxirida Belarusda Roman Protasevich ham afv etilgani haqida xabar berildi. Minsk sudi Protasevichni sakkiz yilga ozodlikdan mahrum qilgandi. U davlat hokimiyatini tortib olishga ommaviy da’vat qilish, terrorchilik harakatlari, prezidentni haqorat qilish, Belarus haqida ataylab yolg‘on ma’lumot tarqatish va boshqa jinoyatlarda aybdor deb topilgandi. Protasevich Belarus Jinoyat kodeksining 11-moddasi bo‘yicha ayblangan.
Izoh (0)