Наманган вилояти Чуст тумани халқ депутатлари Кенгаши депутати ўзига берилган ваколатдан фойдаланиб, давлат томонидан кутубхона қуриш учун ажратилган ерни тадбиркорга сотишга уринди. Бу ҳақда “Бу кун” информацион дастурида маълум қилинди.
Қайд этилишича, 17 май куни Чуст туманида яшовчи фуқаро Наманган вилояти ИИБ бошлиғи номига ариза билан мурожаат қилган. Унинг маълум қилишича, шу йилнинг май ойи ўрталарида Поп тумани ҳудудида алюминий эшик-ром цехи ташкил этиш учун бўш ер майдони излаб юрганида, туман халқ депутатлари кенгаши депутати вазифасида ишловчи шахс билан танишиб қолган. У фуқарога Поп шаҳри марказида ўзига тегишли бўлган собиқ туман кутубхонасининг 4 сотихли бўш ер майдони борлиги ва ушбу ерни 35 минг АҚШ долларига сотишини айтган.
Шунингдек, депутат 10 минг АҚШ доллари эвазига туман кадастр палатасида ишловчи таниши орқали ер ҳужжатларини расмийлаштириб беришни ваъда қилган.
Аризага асосан шу куни вилоят ИИБ Тезкор-қидирув хизмати Жиноят-қидирув бошқармаси Коррупция ва иқтисодий жиноятларга қарши курашиш бўлими, ДХХ Наманган вилояти бошқармаси ходимлари ҳамкорлигида тезкор тадбир ўтказилган. Тадбирда аризада номи келтирилган шахс кимёвий ишлов берилган 10 минг долларни олиб, унга ер майдонига тегишли бўлган қарор нусхасини берганида ушланган.
Терговга қадар текширув давомида мазкур ер майдони депутатга кутубхона қуриш учун берилгани маълум бўлган. Ҳолат юзасидан Поп туман ИИБ томонидан Жиноят кодексининг 168-моддаси (фирибгарлик) 4-қисми билан жиноят ишлари қўзғатилиб, тергов ҳаракатлари олиб борилмоқда.
Ноқонуний ер савдолари
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.
Изоҳ (0)