Фавқулодда вазиятлар вазирлиги Қашқадарё вилояти Қарши шаҳрида жойлашган бозорда юз берган ёнғин юзасидан маълумот берди.
Қайд этилишича, 7 июнь куни соат 11:29 да Қарши шаҳар “Ерқўрғон” бозори ҳудудида жойлашган икки қаватли дўконнинг 2 қаватида ёнғин содир бўлаётгани тўғрисида шаҳар ФВ бўлимига хабар тушган.
Шунга кўра 5 та ёнғин-қутқарув экипажи соат 11:41 да воқеа жойига етиб бориб, ёнғин соат 11:55 да ўраб олинган ва саот 12:00 да ўчирилган. Шунингдек, қўшимча равишда 2 та сув ташишга мўлжалланган транспорт воситаси жалб этилган.
Дасталки маълумотларга кўра, ёнғин натижасида иккинчи қаватда жойлашган дўконнинг 210 квадрат метр майдонда ички ва том қисми ёниб зарарланган.
Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғин сабаби ва моддий зарар миқдори аниқланмоқда.
Ёнғин ҳолатлари
Май охирларида Сурхондарёдаги икки қаватли савдо дўконида ёнғин чиққанди. Ундан олдинроқ эса Қорақалпоғистоннинг Нукус шаҳрида жойлашган бозорга қарашли майдонда ёнғин содир бўлгани, Тошкент вилоятида бир-бирига туташ учта уй ёниб кетгани тўғрисида хабар берилганди. Шунингдек, Қаршидаги кафеларнинг бирида ёнғин содир бўлганди.
Изоҳ (0)