Бухоро вилояти ИИБ Когон туманида поезд ва юк машинаси иштирокида содир бўлган йўл-транспорт ҳодисаси юзасидан маълумот берди.
Қайд этилишича, 6 июнь куни тахминан соат 16:10 ларда Когон тумани ҳудудидан ўтувчи қўриқланмайдиган темир йўл кесишмасидан ҳаракатланиб келаётган поезд тепловози Бухоро тумани “Зарманоқ” маҳалласида яшовчи Б.Л. бошқарувидаги Shacman русумли юк машинаси билан тўқнашиши натижасида йўл-транспорт ҳодисаси содир бўлган.
Мазкур тўқнашув натижасида ҳеч ким тан жароҳати олмаган, фақатгина транспорт воситаларига бир оз техник шикаст етган.
Ҳозирги вақтда ҳолат юзасидан Когон тумани ИИБ томонидан терговга қадар текширув ҳаракатлари олиб борилмоқда.
Поезд ва юк машиналари тўқнашуви
2020 йил май ойида Зарафшон шаҳри яқинида тепловоз поезд ҳамда MAN иштирокида йўл транспорт ҳодисаси юз берганди. Ўша йилнинг октябрида эса Фарғонада шлагбаумни айланиб ўтмоқчи бўлган юк машинаси поезд билан тўқнашиши оқибатида ҳайдовчи воқеа жойида вафот этганди. 2021 йилда бўлса Наманганда поезд ва “ЗИЛ” тўқнашуви оқибатида юк машина ҳайдовчиси жиддий жароҳат олган эди.
Изоҳ (0)