Россия президенти матбуот котиби Дмитрий Песков Каховка ГЭСи портлатилганига муносабат билдириб, ҳодисада Украинани айблади. Бу ҳақда “ТАСС” хабар берди.

Песковга кўра, Россия президенти Владимир Путин вазият ҳақида маълумот олган.

“Президент Мудофаа вазирлиги ва бошқа хизматлардан Каховка ГЭСи атрофида содир бўлаётган воқеалар ҳақида хабар олмоқда. Гап Украина томонининг атайлаб уюштирган қўпоруви ҳақида кетмоқда”, — деди Песков.

У “бу қўпорувчилик минтақанинг бир неча ўн минглаб аҳолиси учун жиддий оқибатларга, шунингдек, экологик ва ҳали аниқланмаган бошқа характердаги муаммоларга олиб келиши мумкинлигини” айтди.

“Москва Каховка ГЭСидаги ракета ҳужумига алоқадорлиги ҳақидаги айбловларни қатъиян рад этади. Бу Киев расмийларининг буйруғи билан амалга оширилган — содир бўлган воқеа учун улар жавобгар бўлиши керак”, — деди Кремль матбуот котиби.

“Биз уларнинг айбловларини қатъиян рад этишимиз мумкин. Шуни расман эълон қиламиз: бу аниқ Украина томонининг Киевдан, Киев режимининг буйруғи билан режалаштирилган ва амалга оширилган атайлаб қилинган саботажи. Киев режими барча оқибатлар учун тўлиқ жавобгарликни ўз зиммасига олиши керак”, — деди у Россияга қарши бундай айбловларга изоҳ бераркан.

Аҳолини эвакуация қилиш талаб қилинадими, деган саволга у: “Билмайман. Энди маҳаллий ҳокимиятдан хабарларни кутишимиз керак”, деди.