“Юксалиш” умуммиллий ҳаракати сўнгги кунларда ижтимоий тармоқларда тақиқланган диний материалларни тарқатганлик айблови билан бир неча шахслар жиноий жавобгарликка тортилгани ҳақидаги хабарлар турли баҳс-мунозараларга сабаб бўлаётганига эътибор қаратди.
Қайд этилишича, ҳаттоки тармоқларда жума муносабати билан табриклаш ҳам мумкин эмаслиги, бунинг учун ҳам жавобгарликка тортилиш эҳтимоли ҳақида асоссиз хабарлар тарқалмоқда.
“Авваламбор, юртимизда эътиқод эркинлигини таъминлаш, халқимизнинг диний эҳтиёжларини қондиришга қаратилган тизимли чоралар кўрилмоқда. Умра зиёрати бўйича квоталар бекор қилиниб, Ҳаж амаллари квоталари оширилди. Масжидлар сони кўпаймоқда ҳамда диний сабабларга кўра норасмий тақибларга барҳам берилди.
Мамлакат янги Конституциясида Ўзбекистон дунёвий ва ҳуқуқий давлат эканлиги алоҳида қайд этилди. Шунингдек, қонунларимизда эътиқод эркинлиги кафолатланган.
Шундай экан, ҳар қандай ижтимоий муносабатлар биринчи галда ҳуқуқий асосда баҳоланиши лозим, деб ҳисоблаймиз. Алоҳида ҳолатлар умумий салбий тенденциядан далолат бермайди”, — дейилади муносабатда.
Шу билан бирга, ҳаракат жамоатчилик орасида резонанс уйғотган ва кўплаб саволлар келтириб чиқарган жиноят ишлари тафсилотлари батафсил ва тезкорлик билан очиқлаб борилиши зарурлигини таъкидлаган. Бу борада ҳуқуқ-тартибот ва суд органлари алоҳида жонбозлик кўрсатишлари, барча ахборотларни ўз вақтида ва тўлиқ равишда жамоатчиликка етказишлари талаб этилган.
“Қолаверса, ижтимоий тармоқларда Ўзбекистонда тақиқланган ташкилотлар атрибутлари, белги ва тасвирлари туширилган электрон табрикномалар ёки арабча ва бошқа хорижий тилларда экстремистик чақириқларни ифодаловчи хабарлар тайёрланиб тарқатиш ҳолатлари кузатилмоқда. Ватандошларимиз эса бу каби маълумотларни билиб-билмай тарқатмоқдалар. Шу сабабли барчани бу масалаларда ҳушёр бўлишларини сўраймиз”, — дейилади хабарда.
Бундан олдин Ўзбекистон мусулмонлари идораси ижтимоий тармоқларда “жума табриги”, “Қуръони карим оятлари”, “Пайғамбар алайҳиссалом ҳадислари”, юртимиз уламолари ва имом-домлаларининг маъвизаларини тарқатиш гўёки мумкин эмас экани айтилаётган асоссиз хабарларга муносабат билдирганди.
Диний идора бузғунчи оқимлар ғояларини ўзига жалб этувчи мусиқий оҳанг, фотосурат ёки рамзлар орқали зимдан тарқатишга уринаётганини эслатиб ўтган. Шунинг учун ҳам экстремистик ғояларни ҳар қандай шаклда хоҳ жума табриги бўлсин, хоҳ бошқача атрибут ёки сурат шаклида бўлсин, уларни тарқатиш, сақлаш ва фойдаланиш қонунан таъқиқланади. Аввалроқ тарқатиш тақиқланган экстремистик сайт ва тармоқлар рўйхати эълон қилинган эди.
Изоҳ (0)