Қашқадарё вилоятининг Яккабоғ тумани ҳокими ўринбосари Фозил Хидиров ҳайфсан олди. У тумандаги ёшлар етакчиларига бир ойлик армия учун талабгор топиш ва шартнома пулини тўлатиш мажбуриятини қўйганди.

Яккабоғ ҳокими Лутфиддин Абдуллаев ўринбосарига ҳайфсан бериш тўғрисидаги қарорни 2023 йилнинг 30 май куни имзолаган.

Яккабоғ тумани ҳокимининг ёшлар сиёсати, ижтимоий ривожлантириш ва маънавий-маърифий масалалар бўйича ўринбосари Фозил Хидиров тумандаги барча ёшлар етакчиларига мурожаат қилиб, йиғилишга тайёргарлик кўриб боришлари кераклигини, ҳамма сафарбарлик чақирувчи резервига бир нафардан фуқарони жалб қилиб, шартнома пулини тўлатиб бориши кераклигини уқтирганди.

“Етакчилар диққатига, ҳамма ўзининг ҳудудидан биттадан СCHR (1 ойлик хизматга) фуқарони топиб, пулини тўлатиб бормаса, вазифасидан озод этишгача бўлган чоралар кўрилади. Шу топшириққа масъулият билан қаранглар, йиғилишга пиллага 20:00 дан етиб боринглар“, деганди Фозил Хидиров ёшлар етакчиларига Telegram орқали топшириқ берар экан. Ҳолбуки, Ўзбекистон президентининг “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарорида етакчиларни уларнинг вазифа ва фаолият йўналишлари билан боғлиқ бўлмаган йиғилиш ва бошқа тадбирларга жалб қилиш, уларнинг фаолиятига асоссиз аралашиш, тааллуқли бўлмаган вазифаларни юклаш тақиқлангани белгилаб қўйилган.