“Yuksalish” umummilliy harakati so‘nggi kunlarda ijtimoiy tarmoqlarda taqiqlangan diniy materiallarni tarqatganlik ayblovi bilan bir necha shaxslar jinoiy javobgarlikka tortilgani haqidagi xabarlar turli bahs-munozaralarga sabab bo‘layotganiga e’tibor qaratdi.

Qayd etilishicha, hattoki tarmoqlarda juma munosabati bilan tabriklash ham mumkin emasligi, buning uchun ham javobgarlikka tortilish ehtimoli haqida asossiz xabarlar tarqalmoqda.

“Avvalambor, yurtimizda eʼtiqod erkinligini taʼminlash, xalqimizning diniy ehtiyojlarini qondirishga qaratilgan tizimli choralar ko‘rilmoqda. Umra ziyorati bo‘yicha kvotalar bekor qilinib, Haj amallari kvotalari oshirildi. Masjidlar soni ko‘paymoqda hamda diniy sabablarga ko‘ra norasmiy taqiblarga barham berildi.

Mamlakat yangi Konstitutsiyasida O‘zbekiston dunyoviy va huquqiy davlat ekanligi alohida qayd etildi. Shuningdek, qonunlarimizda eʼtiqod erkinligi kafolatlangan.

Shunday ekan, har qanday ijtimoiy munosabatlar birinchi galda huquqiy asosda baholanishi lozim, deb hisoblaymiz.  Alohida holatlar umumiy salbiy tendensiyadan dalolat bermaydi”, — deyiladi munosabatda.

Shu bilan birga, harakat jamoatchilik orasida rezonans uyg‘otgan va ko‘plab savollar keltirib chiqargan jinoyat ishlari tafsilotlari batafsil va tezkorlik bilan ochiqlab borilishi zarurligini ta’kidlagan. Bu borada huquq-tartibot va sud organlari alohida jonbozlik ko‘rsatishlari, barcha axborotlarni o‘z vaqtida va to‘liq ravishda jamoatchilikka yetkazishlari talab etilgan.

“Qolaversa, ijtimoiy tarmoqlarda O‘zbekistonda taqiqlangan tashkilotlar atributlari, belgi va tasvirlari tushirilgan elektron tabriknomalar yoki arabcha va boshqa xorijiy tillarda ekstremistik chaqiriqlarni ifodalovchi xabarlar tayyorlanib tarqatish holatlari kuzatilmoqda. Vatandoshlarimiz esa bu kabi ma’lumotlarni bilib-bilmay tarqatmoqdalar. Shu sababli barchani bu masalalarda hushyor bo‘lishlarini so‘raymiz”, — deyiladi xabarda.

Bundan oldin O‘zbekiston musulmonlari idorasi ijtimoiy tarmoqlarda “juma tabrigi”, “Qurʼoni karim oyatlari”, “Payg‘ambar alayhissalom hadislari”, yurtimiz ulamolari va imom-domlalarining ma’vizalarini tarqatish go‘yoki mumkin emas ekani aytilayotgan asossiz xabarlarga munosabat bildirgandi.

Diniy idora buzg‘unchi oqimlar g‘oyalarini o‘ziga jalb etuvchi musiqiy ohang, fotosurat yoki ramzlar orqali zimdan tarqatishga urinayotganini eslatib o‘tgan. Shuning uchun ham ekstremistik g‘oyalarni har qanday shaklda xoh juma tabrigi bo‘lsin, xoh boshqacha atribut yoki surat shaklida bo‘lsin, ularni tarqatish, saqlash va foydalanish qonunan taʼqiqlanadi. Avvalroq tarqatish taqiqlangan ekstremistik sayt va tarmoqlar ro‘yxati eʼlon qilingan edi.