Тошкент шаҳрида 3 июнь — Бутунжаҳон велосипед куни муносабати билан веломарафон ўтказилиши режалаштирилган. Шу муносабат билан 4 июнь куни соат 08:00 дан 11:00 га қадар бир неча кўчалар ёпилади. Бу ҳақда пойтахт ҳокимлиги хабар берди.
Ёпиладиган кўчалар:
- Абай кўчаси Абдулла Қодирий кўчаси билан кесишмасидан Алишер Навоий кўчаси кесишмасигача;
- Олмазор кўчаси Алишер Навоий кўчаси билан кесишмасидан “Ўзбекистон” метро бекатигача;
- Афросиёб кўчаси “Ўзбекистон” метро бекатидан Нукус кўчаси билан кесишмасигача;
- Нукус кўчаси Афросиёб кўчаси билан кесишмасидан Фарғона йўли кўчаси кесишмасигача;
- Абдулла Қодирий кўчаси Фарғона йўли кўчаси билан кесишмасидан Абай кўчаси кесишмасигача.
Ҳокимлик ноқулайликлар учун узр сўраган ҳолда, ҳайдовчиларга айланма йўллардан фойдаланишни тавсия этган.
Бунга қадар велоспортнинг шоссе тури бўйича Оқтош—Чорбоғ Mountаин халқаро мусобақаси ўтказилиши муносабати билан 10 ,11, 13, 14 май кунлари соат 08:00 дан 17:00 га қадар Тошкент вилоятининг Бўстонлиқ ва Юқори Чирчиқ туманларидан ўтган автомобиль йўллари вақтинчалик ёпилганди.
Изоҳ (0)