Бухоро шаҳрида ўзганинг автомашинасини қасддан ёқиб юборган жиноий гуруҳ қўлга олинди. Бу ҳақда Бухоро вилояти ИИБ ахборот хизмати хабар берди.

Қайд этилишича, 26 май куни тахминан соат 23:30 ларда номаълум шахс ўзганинг мол-мулкини яширин равишда талон-торож қилиб, текин бойлик орттириш мақсадида Бухоро шаҳар Мустақиллик кўчасидаги “Қаҳҳоров” ўқув маркази олдидан ўтувчи йўл ёқасида носоз, қаровсиз қолдирилган “Жигули” русумли автомашинанинг эшиклари очиқлигидан фойдаланиб, автомашинага кирган.

Машинанинг бар қисмидан пул ёки бошқа моддий қимматликларни қидириб, топа олмаган шахс далилларни йўқотиш ва ўзининг жиноий қилмишларини яшириш мақсадида машинага қасддан ўт қўйиб юборган.

Мазкур ҳолат юзасидан номаълум шахсга нисбатан Жиноят кодексининг 169-моддаси 2-қисми ҳамда 173-моддаси билан жиноят иши қўзғатилган. Олиб борилган тезкор техник, суриштирув ҳамда тергов ҳаракатлари давомида ушбу жиноятни Бухоро шаҳрида яшовчи 13 ёшли Қ.С. ҳамда 14 ёшли Р.Ш. олдиндан жиноий тил бириктириб, бир гуруҳ бўлиб содир этгани аниқланган.

Ҳозирги кунда жиноят иши юзасидан дастлабки тергов ҳаракатлари олиб борилмоқда.

Машиналарнинг ёқиб юборилиш ҳолатлари

2022 йил июлда Бухорода эркак кабутарлари учиб кетгани сабаб маҳалладошининг Lacettiъсини ёқиб юборганди. Суд ҳукми билан у 2 йил 6 ой муддатга озодликдан маҳрум қилинган. Шунингдек, ундан олдин Наманганда эркак ўзи гаплашиб юрган аёлнинг Malibu-2 сини ёқиб юборгани, Самарқандда маст ҳолда ИИБ ходимларининг хизмат машинасини ёқиб юборган эркакка суд ҳукми ўқилгани тўғрисида хабар берилганди.