Украина Қуролли кучлари қуруқликдаги қўшинлари қўмондони Александр Сирский қўмондонлик қарори билан Бахмут йўналиши қанотлари бўйлаб юриш тўхтатилганини маълум қилди.
Жаноб Сирскийнинг сўзларига кўра, ҳозир Украина томони ўз бўлинмаларининг жанговар қобилиятини тиклашга эътибор қаратган.
“Сўнгги бир неча кун ичида қанотларда олдинга силжиш тўхтатилди, чунки у ерда бошқа муҳим вазифалар бажарилди. Гуруҳимиз қўмондонлиги бўлинмаларимизнинг жанговар қобилиятини тиклаш ва душман ниятларини бузишга қаратилган тегишли чораларни кўрмоқда”, — деди у “Украинская правда” газетасига берган интервьюсида.
Александр Сирскийнинг сўзларига кўра, Бахмутда ўтказилган “операция формати” “Вагнер” бўлинмалари олиб чиқилиб, уларни армия ва ҳаво-десант бўлинмалари билан алмаштиргандан сўнг ўзгартирилди.
“Ҳозирда вазият тинчдек таассурот уйғотиши мумкин. Аммо, афсуски, бу вақтинчалик сукунат”, — дея қўшимча қилди у. “Вагнер” ХҲК асосчиси Евгений Пригожин 25 май куни ўз бўлинмалари шаҳардан олиб чиқилишини эълон қилганди.
Изоҳ (0)