Тошкент вилоятидаги мавжуд болалар боғчаларида кадрлаш етишмаслиги ва тарбияланувчиларнинг овқатланиш тизимидаги камчиликлар билан боғлиқ муаммолар бор. Бу ҳақда вилоят ҳокими Зоир Мирзаев 1 июнь — Халқаро болаларни ҳимоя қилиш куни муносабати билан Тошкент туманида янги иш бошлаган 560 ўринли боғча очилишида гапирди, дея хабар берди “Дарё” мухбири.
Вилоят ҳокими тадбирда сўз олар экан, Тошкент туманининг “Ҳасанбой” маҳалласида иш бошлаган боғча қурилишига 15,6 миллиард сўм сарфланганини, вазирлик мазкур муассасани таъмирлаш учун яна 1 миллиард сўмдан ортиқ маблағ сарфлаганини очиқлади.
“Дунё халқларининг барчаси болажон халқ, албатта. Аммо ҳеч қайси халқ ўзбек халқи каби болажонларига меҳр бермаса керак. Бугун бутун республикамизда бўлгани каби, Тошкент вилоятида ҳам болажонлар камоли учун кўплаб ишлар амалга оширилмоқда. Бундан беш-олти йил аввал боғчаларнинг аксарияти сотилиб, борлари ҳам ночор ҳолатга келиб қолганди. Биз ҳатто колхозлардан қолган боғчалар билан ҳам кун ўтказиб келдик. Лекин бугунги кунга келиб, биз боғчаларимизни замонавий биноларга айлантирдик. Тадбиркорлар шундай катта биноларни қурмоқда. Бугун очилаётган боғча республикадаги ягона боғчалардан бири”, — дейди вилоят ҳокими.
.jpg)
Зоир Мирзаев тадбирда, шунингдек, оммавий ахборот воситалари вакилларини қизиқтирган саволларга ҳам жавоб берар экан, “Дарё” мухбирининг “вилоятдаги мавжуд боғчаларда энг оғриқли муаммолар нималардан иборат?”, деган саволига қуйидагича жавоб қайтарди.
“Тошкент вилоятидаги мавжуд болалар боғчаларида иккита энг асосий муаммо бор. Биринчиси кадрлар етишмаслиги бўлса, иккинчиси тарбияланувчиларнинг овқатланиши билан боғлиқ муаммо ҳисобланади. Тошкент вилоятида замонавий, барча талабларга жавоб берадиган болалар боғчалари кўп, аммо болаларга таълим беришда алоҳида методик ёндашувга эга, замон билан ҳамнафас кадрлар етишмаяпти. Айни кунда болалар боғчалари учун 600 нафарга яқин малакали кадрларга эҳтиёж бор. Иккинчи масала болалар боғчасидаги овқат масаласидир. Аутсорсинг тизими ёки кейтеринг тизими танлаб олинган. Лекин бу тўлақонли ишламаяпти. Биз Қибрай туманида Филиппин билан биргаликда болалар таомларини ишлаб чиқаришни йўлга қўймоқчимиз. Масалан, бизда шарбат ишлаб чиқарувчилар бор, лекин ёши катталарга ҳам, болалар учун ҳам ишлаб чиқарилган шарбатларнинг таркиби бир хил. Филиппин корхонасидан боғчаларимиз учун кейтеринг хизматини кўрсатишларини сўрадик. Агар шу лойиҳа ишга тушса, иккинчи муаммога ечим топган бўламиз”, — дейди вилоят ҳокими Зоир Мирзаев.
Изоҳ (0)