Тошкент шаҳар Чилонзор туманида авария ҳолати сабабли кўп қаватли уйда яшовчилар бошқа ҳудудга кўчирилмоқда. Шаҳар ҳокимлиги ҳолат юзасидан маълумот берди.
Унга кўра, Наққошлик кўчаси 3а-уйда авария ҳолати юзага келган. Мазкур манзилдаги кўп қаватли уйда ёриқлар пайдо бўлаётгани туман ҳокими бошчилигидаги масъуллар ва ФВВнинг Тошкент шаҳар ва туман бўлими мутахассислари томонидан ўрганилиб, ҳолат инсонлар саломатлиги ва ҳаёти хавфсизлигига таъсир қилишининг олдини олиш мақсадида фуқароларни бошқа манзилларга кўчиришга қарор қилинган.
Ҳозирда ушбу хонадонларда яшовчи 104 нафар фуқародан 41 нафари, яъни 15 та оила бошқа манзилларда истиқомат қилувчи яқинларининг хонадонларига кўчиб ўтмоқда. 17 та хонадонда яшовчи 63 нафар фуқаро эса вақтинча турар жой билан таъминланди.
Айни пайтда мутасаддилар томонидан ушбу уй аҳолисини турар жой билан таъминлаш масаласи кўриб чиқилмоқда.
Изоҳ (0)