Хоразм вилояти Хонқа туманида яшовчи фуқарони дўппослаган департамент ходимларига чора кўрилмагани айтилди. Вилоят прокуратураси ушбу хабар юзасидан маълумотларни тақдим этди.
Хабарга кўра, вилоят прокуратураси томонидан ижтимоий тармоқлар орқали Хонқа туманида яшовчи фуқаронинг ушбу шикояти ўрганилди. Аниқланишича, департаментнинг Хоразм вилоят бошқармаси томонидан 25 февралда фуқаро Х.Шамақовга нисбатан Жиноят кодексининг 168-моддаси 1-қисми ва 28,211-моддаси 1-қисми билан жиноят иши қўзғатилган.
Жиноят иши қўзғатилишига департамент ва ДХХ ходимлари томонидан фуқаро М.Қиличеванинг аризаси юзасидан 23 февралда ўтказилган тезкор тадбирда Ш.Х. ариза муаллифини ва унинг қизини Урганч шаҳридаги тиббиёт бирлашмаларининг бирига юқори лавозимларда ишловчи танишлари орқали ишга киритиб бериш эвазига 1500 доллар талаб қилиб, шундан 1400 доллар ва 1 миллион сўм олгани юзасидан тўпланган ҳужжатлар асос бўлган.
Жиноят иши бўйича тергов ҳаракатлари олиб борилиб, 15 майда Х.Шамақовга Жиноят кодексининг 168-моддаси 1-қисми, 28,211-моддаси 1-қисми, 219-моддаси 2-қисми, 109-моддаси 2-қисми билан айблов эълон қилиниб, гаров эҳтиёт чораси қўлланган.
Шунингдек, Х.Шамақов ҳамда унинг ҳимоячисига дастлабки тергов тамомлангани эълон қилинган ва улар жиноят иши ҳужжатлари билан таништирилган.
Х.Шамақов департамент ва ДХХ ходимлари уни ушлаб, уриб тан-жароҳатлари етказгани ҳақидаги кўрсатмалари бўйича тергов ҳаркатлари олиб борилиб, унинг кўрсатмалари ўз тасдиғини топмагани сабабли ишнинг ДХХ ва департамент ходимларига нисбатан бўлган қисми Жиноят процессуал кодексининг 83-моддаси 2-бандига асосан тугатилган.
Жиноят иши айблов хулосаси билан 16 май куни Хоразм вилоят судига юборилган.
Изоҳ (0)