Қашқадарё вилоятининг Чироқчи туманида аҳолига бораётган тоза ичимлик суви қувури тешилиб, истеъмолга яроқли сув 321 метр узоқликдаги балиқ кўлига оқизиб қўйилгани аниқланди. Бу ҳақда “Дарё”га “Қашқадарё сув таъминоти” МЧЖ ахборот хизмати раҳбари Ихтиёр Умаров маълум қилди.
Қайд этилишича, ушбу ҳолат “Қашқадарё сув таъминоти” МЧЖ Шаҳрисабз—Қарши сув ишлаб чиқариш филиали ишчи гуруҳи рейдида аниқланган.
“Тадбирда мазкур бош сув қувурнинг ‘Қаҳрамон’ маҳалласидан ўтган қисмида А.А. исмли шахс томонидан балиқчилик фермер хўжалиги ташкил этилгани, балиқ кўлига диаметри 76 мм бўлган қувур орқали ноқонуний равишда уланиб, тоза ичимлик суви балиқ кўли ҳавзасига оқизиб қўйилгани маълум бўлди. Ҳолат юзасидан тегишли далолатнома тузилиб, ноқонуний уланма бош сув қувуридан узилган ҳамда қонунбузарга нисбатан чора кўриш учун Ичимлик сувидан фойдаланишни назорат қилиш вилоят ҳудудий инспекциясига тақдим этилган”, — дейди Ихтиёр Умаров.
.jpg)
Қўшимча қилинишича, 2022 йилда вилоятда ичимлик суви қувурига 100 дан ортиқ ноқонуний уланишлар бўлгани аниқланиб, шундан 16 та ҳолатда жиноий иш қўзғатилган. Икки ҳолатда қамоққа олиш эҳтиёт чораси қўлланилган.
Изоҳ (0)