Венгрия бош вазири Виктор Орбан Украина Россияга қарши урушда ғалаба қозона олмаслигини айтди. Бу ҳақда у Bloomberg’га берган интервьюсида маълум қилди.
“Рақамларга, атроф-муҳитга, НАТО қўшин юборишга тайёр эмаслигига назар ташласак, жанг майдонида бечора украиналикларнинг ғалабаси бўлмаслиги аниқ”, — деди Орбан.
Сиёсатчига кўра, Россия АҚШ билан келишувга эришгандагина, урушни тўхтатиши мумкин. У Дональд Трамп келаси йилги президентлик сайловларида ғалаба қозонишига умид қилишини ва президент Байденнинг фикрига қўшилмаса-да, “АҚШни танқид қилиш бизнес учун ёмон” эканини билдирди.
Доҳада бўлиб ўтган Қатар иқтисодий форумида нутқ сўзлаган Орбан ўтган йили Россия қўшни давлатга бостириб кирганидан сўнг унинг ҳукумати Европа Иттифоқининг Украинага нисбатан “асосий” ёндашувидан четга чиққанини айтди.
Венгрия Европа Иттифоқининг Украинага 500 миллион евро (540 миллион доллар) миқдоридаги молиявий ёрдам траншига тўсқинлик қилмоқда. Орбан Киев ҳукумати билан икки томонлама келишмовчиликларни келтириб, Россияга нисбатан янги санкцияларга қарши чиққан.
Журналистларнинг эслатишича, Венгрия Украинага Россия босқинини қайтариш учун қурол етказиб беришдан бош тортган кам сонли НАТО аъзоларидан биридир. Орбаннинг танқидчиларига кўра, унинг Европа Иттифоқини Киевга ажратиладиган маблағни қисқартиришга чақириши Россия агрессиясига таслим бўлиш талабига ўхшайди.
Изоҳ (0)