Венгрия Халқаро суд қарори билан Путинни ҳибсга олмайди, Мьянма қарорни эътиборсиз қолдиради

Россия президенти Владимир Путин Венгрияга келса, мамлакат ҳукумати уни Халқаро жиноий суд (ХЖС) буйруғи билан ҳибсга олмайди, деди Венгрия бош вазири Виктор Орбан идораси раҳбари Гергели Гульяш.

Унинг сўзларига кўра, Венгрия Рим статутини имзолаган ва ратификация қилган бўлса-да, мамлакатда Путинни ҳибсга олиш учун ҳеч қандай қонуний асос йўқ. ХЖС Рим статути асосида фаолият юритади.

Гоуяш низом Венгрия ҳуқуқ тизимига киритилмаганига ишора қилди. “Биз фақат Венгрия қонунчилигига мурожаат қила оламиз ва унга асосланиб, Россия президентини ҳибсга олмаймиз, чунки ХЖС низоми Венгрияда эълон қилинмаган”, — деб тушунтирди идора вакили.

У, шунингдек, Венгрия ҳукумати ХЖСнинг Путинга нисбатан қарори юзасидан ўз “позициясини шакллантирмаганини” айтди.

Шунингдек, Мьянма ҳукумати ХЖСнинг Путинни ҳибсга олиш ҳақидаги ордерини эътиборсиз қолдиришга қарор қилди. Бу ҳақда Мьянма давлат маъмурий кенгаши ахборот гуруҳи раҳбари генерал майор Зо Мин Тун маълум қилди. Ушбу кенгаш 2021 йилда ҳокимиятга келган ҳарбий хунта томонидан тузилган.

Зо Мин Тун Россия ҳам Мьянма сингари Халқаро жиноий суднинг аъзоси эмаслигини эслатди.

“Айтишим керакки, ХЖС томонидан қабул қилинган қонунлар Россияга таъсир қилмайди. Биргина шу фактнинг ўзи ХЖСнинг Путинни ҳибсга олиш ҳақидаги қарорига эътибор бермаслик учун етарли”, — деди Зо Мин Тун.

ХЖС Путинни ҳибсга олишга ордер берган

17 март куни Гаагадаги Халқаро жиноий суд Россия президенти Владимир Путинни ҳибсга олишга ордер берганди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер Россия болалар омбудсмани Мария Львова-Беловага нисбатан ҳам чиқарилган.

Кремль ХЖС қарорини “ғазаблантирадиган” деб атади, шу билан бирга, Россия бу суднинг юрисдиксиясини тан олмаслигини таъкидлади. Россия Ташқи ишлар вазирлиги ордернинг “аҳамиятсиз”лигини айтди. Путиннинг ўзи ХЖС қарорига изоҳ бермади.