Германия ва Венгрия ташқи ишлар вазирлари Украинага ёрдам бериш масаласида жанжаллашди. Бунга Киев Венгриянинг OTP банкини урушнинг халқаро ҳомийси сифатида тан олганидан сўнг Будапешт Украинага Европа Иттифоқининг ёрдамини тўсиб қўйишга қарор қилгани сабаб бўлди, деб ёзмоқда Politico нашри.
Икки вазир ўртасидаги жанжал ҳақида журналистларга исми сир қолишни истаган тўрт дипломат айтиб берди. Уларнинг сўзларига кўра, воқеа 22 май куни Брюсселда ташқи ишлар вазирларининг учрашуви чоғида содир бўлган.
Венгрия Киев OTP банкини “уруш ҳомийлари” рўйхатидан чиқариб ташламагунча, Европа Иттифоқининг Украинага қўшимча ҳарбий ёрдамини маъқуллашдан бош тортмоқда. Дипломатлар тортишув Россияга қарши янги санкцияларни кечиктираётганини ҳам айтди.
Венгрия ташқи ишлар вазири Пётер Сиярто Будапештнинг Украинага ёрдам беришни тўхтатиш ниятини тасдиқлаганида, Германия ташқи ишлар вазири Анналена Бербок унга норозилик билдирган. Бербок OTP банки босиб олинган Украина ҳудудларини Россиянинг бир қисми сифатида тан олгани ва рус аскарларига кредит линиялари тақдим этгани ҳақидаги аниқлаштирилмаган хабарларни ўртага ташлаган.
Венгрия вазири бу даъволарни рад этиб, банкнинг “Украинани қўллаб-қувватлашини ошкора изҳор этувчи” баёнотларини келтирган. Учрашувда Швеция ва Эстония вакиллари ҳам Венгрияга босим ўтказган. Улар Европа Иттифоқининг санкцияларини айланиб ўтишни тўхтатишга қаратилган янги санкциялар жорий қилишни ва Украинага кўпроқ ҳарбий ёрдам беришни кечиктирмаслик зарурлигини таъкидлаган.
“Ушбу тортишув Европа Иттифоқи давлатларининг Россияни жазолаш ва Украинани қўллаб-қувватлаш бўйича кўплаб ҳаракатларни блоклаётган Венгрияга нисбатан норозилиги кучайиб бораётганини акс эттиради, Гарчи Будапешт имтиёзлар олганидан кейин таслим бўлишга мойиллик билдирса-да, кечикишлар кўпчиликнинг ғазабига сабаб бўлмоқда”, — деб ёзади газета.
OTP банки билан вазият
Май ойи бошида Украина коррупциянинг олдини олиш миллий агентлиги Венгрия OTP банкини урушнинг халқаро ҳомийлари рўйхатига киритди. Бундай қарорга банкнинг Россиядаги фаолиятини давом эттириш позицияси ҳамда Донецк ва Луганск “халқ республикалари”нинг амалда тан олиниши сабаб бўлди.
Компаниянинг “уруш ҳомийлари” рўйхатига киритилиши ҳеч қандай ҳуқуқий оқибатларга олиб келмаса-да, Россияга қарши ҳаракатларга тўсқинлик қилиб келаётган Венгрия буни баҳона қилиб, ниҳоят, Европанинг Украинага ҳарбий ёрдамини блоклади. Будапешт банкни рўйхатдан олиб ташлашни талаб қилмоқда.
Изоҳ (0)