Афғонистонда олган жароҳати туфайли икки оёғидан айрилган Британия армияси фахрийси, 43 ёшли Хари Будҳа Магар Эверест чўққисига чиқди. У икки тиззасидан юқориси ампутация қилинган бўлса-да, Ернинг энг баланд чўққисини (8848,86 метр) забт этган биринчи одамга айланди, деб ёзмоқда BBC News.
Собиқ ҳарбий ва бир гуруҳ непаллик алпинистлар 19 май, жума куни Лондон вақти билан соат 15:00 да (Тошкент вақти билан 19:00) Эверест чўққисига чиқди. Жамоанинг экспедицияси 17 апрель куни — Хари иккала оёғидан айрилган кундан роппа-роса 13 йил ўтиб бошланганди, деб таъкидлайди The Guardian.
Хари Непалда улғайган, сўнг мамлакатни тарк этиб, Британия армиясидаги “гуркхлар” (непаллик кўнгиллилардан ташкил топган Британия армияси бўлинмаси) полкига қўшилган. 2009 йилда у Кентерберига кўчиб ўтади. Орадан бир йил ўтиб, Афғонистонда хизмат қилаётган пайтда Хари қўлбола портловчи қурилмани босиб олади ва портлаш оқибатида икки оёғидан айрилади.
Тиббий операциядан сўнг, Хари “ҳаёти тугаганини” ҳис қилган. У “оғир дамлар бўлган”ини — тушкунликка тушиб, ичкиликка берилгани ва бир неча бор ўз жонига қасд қилишга уринганини айтади. Кейин у спорт билан шуғулланишни бошлаган, жумладан, голф, чанғи ва тош кўтаришга ўтган, BBC News хабарига кўра, бу унга “ўзига бўлган ишончни қайта тиклашга” ёрдам берган.
Хари Эверестга экспедицияни бир неча йиллардан бери режалаштириб келарди, аммо 2017 йилда Непал ҳукумати бахтсиз ҳодисалар сонини камайтириш учун тоққа чиқиш қоидаларини кучайтирди. Хусусан, улар икки оёғи кесилган одамлар учун тоққа чиқишни тақиқлаган. Бошқа алпинистлар билан бирлашиб, Хари тақиққа қарши чиқди. BBC News хабарига кўра, тоққа чиқишда у махсус протезлардан фойдаланган.
Чўққига чиқишдан олдин Хари жамоаси Эверестдаги таянч лагерида 18 кун қолиб, кўтарилиш учун қулай об-ҳаво шароитини кутди. Ҳаво жуда совуқ эди. Экспедиция аъзолари икки алпинистнинг жасади тоғдан туширилишига гувоҳ бўлди.
Чўққига етиб борган Хари сунъий йўлдош телефони орқали журналистлар билан боғланиб, чўққига чиқиш у тасаввур қилганидан ҳам қийинроқ эканини айтди. Хари чўққида бор-йўғи бир неча дақиқа вақт ўтказди, чунки ёмон об-ҳаво туфайли қуёшдан сақлайдиган кўзойнак ва кислород ниқоби музлаб қолганди. Пастга тушиш вақтида жамоада кислород тугаб қолди. Уларга янги баллонларни бошқа алпинистлар етказиб берди.
“Менинг энг катта мақсадим ногиронлар ҳақидаги тасаввурни ўзгартириш ва бошқа одамларни ўзи истаган тоғни забт этишга илҳомлантириш эди. Сизнинг орзуларингиз қанчалик катта, имкониятларингиз қанчалик чекланган бўлмасин, фикрлашни ўзгартириш билан ҳамма нарсанинг имкони топилади”, — деди Хари тоғдан тушгач.
Гуруҳ ҳозирда Харини Буюк Британияга кузатишдан олдин дам олмоқда.
Изоҳ (0)