Ўзбекистон бандлик ва меҳнат муносабатлари вазири Нозим Ҳусанов Москвада Россия меҳнат ва аҳолини ижтимоий муҳофаза қилиш вазири Антон Котяков билан учрашди, деб хабар бермоқда вазирлик матбуот хизмати.
Хабарда айтилишича, мулоқот чоғида Ўзбекистон фуқароларининг Россияда меҳнат фаолиятини ташкил этиш тизимини такомиллаштириш ва жалб этиш соҳасида ҳамкорлик истиқболлари муҳокама қилинди. Бундан ташқари, қурилиш ва қишлоқ хўжалиги соҳаларига меҳнат мигрантларини жалб этишнинг соддалаштирилган тартиби, меҳнат жараёнларини рақамлаштириш ва қонунчилкдаги инновациялар бўйича тажриба лойиҳасини амалга ошириш масалалари кўриб чиқилган.
Бандлик ва меҳнат муносабатлари вазири Нозим Ҳусанов россиялик ҳамкасбига Ўзбекистон Меҳнат вазирлиги ва икки мамлакат савдо-саноат палаталари ўртасида касб-ҳунар таълими тизимини қўллаб-қувватлаш ва назорат қилишни назарда тутувчи ҳамкорлик тўғрисидаги уч томонлама битим имзолангани ҳақида маълумот берди.
«2017 йилда имзоланган ташкилий ишга қабул қилиш бўйича ҳукуматлараро келишув пандемия даврида меҳнат бозоридаги мавжуд вазиятни ҳисобга олган ҳолда янгиланиш ва тузатишларни талаб қилади. Ишга қабул қилиш тартиб-таомилларини ҳам ходим, ҳам иш берувчи учун имкон қадар содда ва қулай қилиб, ҳар икки томон учун зарур кафолатларни таъминлаш зарур», — деган Нозим Ҳусанов.
Вазирнинг сўзларига кўра, айни пайтда Ўзбекистон Бандлик ва меҳнат муносабатлари вазирлиги меҳнат бозорида талаб юқори бўлган кадрларни касбга тайёрлаш ва қайта тайёрлаш тизимини ташкил этишда етакчи роль ўйнамоқда. Мамлакатнинг ҳар бир ҳудудида ишсиз аҳолига хизмат кўрсатиш, касб-ҳунар ва тил ўргатиш, тадбиркорликка ўргатиш, меҳнат миграцияси масалалари бўйича маслаҳатлар беришнинг ўзига хос тизими ҳам яратилган.
Музокаралар натижасида томонлар 2017 йилги ташкилий ишга қабул қилиш тўғрисидаги шартномага ўзгартиришлар киритиш, меҳнат муносабатларини рақамлаштириш ва меҳнат муҳофазасини таъминлаш, корхоналарда шикастланишлар даражасини пасайтириш соҳасида меҳнат органлари ходимларини қўшма ўқув дастурлари ва амалиёт ўташ жараёнини режалаштириш, шунингдек, меҳнат қонунчилигини такомиллаштириш бўйича келишувларга эришди.
Эслатиб ўтамиз, 2020 йилнинг декабрида Ўзбекистон Ташқи меҳнат миграцияси агентлиги ва Россия Паспорт-виза хизмати ҳамда Москва шаҳрининг Кўп тармоқли миграция маркази ўртасида ҳамкорлик тўғрисида келишувлар имзоланганди. Ушбу ҳужжат Россияда меҳнат қилиш истагида бўлган Ўзбекистон фуқароларини ташкиллаштирилган ҳолда чиқиш жараёнларини соддалаштириши айтилганди.
2021 йилнинг апрелида Россия Ички ишлар вазирлиги меҳнат мигрантлари учун электрон патентларни жорий этиш режаларини эълон қилди.
Изоҳ (0)