Туркиядаги президентлик сайловларининг иккинчи босқичида Ражаб Тоййиб Эрдўғон ғалаба қозонса, асосий вазифалардан бири янги конституцияни ишлаб чиқиш бўлади. Бу ҳақда Эрдўғон TRT Haber телеканалига берган интервьюсида маълум қилди.
“Энг катта истагимиз — миллий иродамизни ҳисобга олган ҳолда мамлакатимизни янги конституция сари етаклаш. Бу янги даврдаги энг катта ташаббусларимиздан бири бўлади. Биз демократияни давлат тўнтариш даври маҳсули бўлган конституциядан қутқармоқчимиз”, — деди Эрдўғон.
Унинг аниқлик киритишича, бу масала аввало ўзининг партияси иттифоқи доирасида баҳоланади (Эрдўғон Адолат ва тараққиёт партиясини бошқаради, президентлик учун ўнг қанот “Республикачилар альянси”дан номзодини қўймоқда), кейин эса бошқа партиялар билан мулоқот ўтказилади.
14 май куни Туркияда президентлик сайловининг биринчи босқичи бўлиб ўтди. Эрдўғон 49,24 фоиз овоз олди. Унинг асосий рақиби Кемал Қиличдарўғли 45,07 фоиз овоз тўплади. Ҳар икки номзод 28 май куни бўлиб ўтадиган иккинчи босқичга йўл олди. Сайловда ҳаммаси бўлиб тўрт номзод бор эди.
Биринчи турда 5 фоиз овоз олган Ата партияси вакили Синан Оған иккинчи турда амалдаги етакчини қўллаб-қувватлашини айтди. Эрдўғон унинг баёнотига изоҳ берар экан, у билан Оған ўртасида “мутлақо савдолашиш” бўлмаганига ишонтирди. Оғаннинг вице-президент ёки вазирликда даъвоси борми деган саволга жавобан Эрдўғон бундай сўров йўқлигини айтди.
Изоҳ (0)