Россия узоқ йиллардан бери таҳдид бўлиб келмоқда, шунинг учун Украина Ғарбдан хавфсизлик кафолатлари олиши керак, деди Австрия ташқи ишлар вазири Александр Шалленберг Германиянинг Die Welt газетасига берган интервьюсида.

Шу билан бирга, Австрия дипломатияси раҳбари ҳозирги ўн йиллик якунига қадар Россияда сиёсий раҳбарият ўзгариши даргумон, деган фикрни билдирди. “Россиядаги сиёсий тизим ва сиёсий раҳбарият шу ўн йилликнинг охирига қадар сезиларли даражада ўзгаради, деб ўйламайман. Россия билан муносабатларимизда бизга энг муҳим капитал — ишонч етишмайди”, — деди у.

Шалленберг қўшимча қилишича, “Ғарб, шу жумладан Украина” келгусида Россиянинг турли келишувларга риоя қилишига ишона олмайди.

Ҳарбий жиноятлар содир этган шахсларни жавобгарликка тортиш ҳақида

Дипломатнинг сўзларига кўра, Ғарб Украинада ҳарбий жиноят содир этган россияликларни, шунингдек, “Россия сиёсий раҳбариятини ҳарбий жиноятлар ва босқинчилик жинояти учун жавобгарликка тортишда” қатъий бўлиши керак.

Айни пайтда, Украинада давом этаётган уруш ва Россияга қарши кенг қамровли санкцияларга қарамай, Австрия ҳукумати Москва билан норасмий каналлар орқали мулоқот қилишда давом этмоқда, деди у. “Ғарб Россия билан гаплашишни давом эттириши керак, АҚШ маъмурияти ҳам. Зиммамизда глобал масъулият бор. Россия дунё харитасидан ўчгани йўқ”, — деди Шалленберг.