Украина президенти Владимир Зеленский Россия кучлари Донецк вилоятидаги Бахмут шаҳрини қўлга киритмаганини айтди. Бу ҳақда президентнинг нутқига таяниб, “Украинская правда” хабар берди.
Зеленский “Еттилик гуруҳи” саммити бўлиб ўтаётган Япониянинг Хиросима шаҳридаги матбуот анжуманида бу ҳақда гапирган.
“Биз жангчиларимизнинг жасорати ва ақлимиз туфайли шаҳарни ушлаб турамиз ва курашамиз. Одамларни ўлим ёқасига ташламаймиз, биз учун одамлар хазина ва бу бизда мавжуд бўлган энг муҳим нарса.
Ҳеч қандай тушунмовчилик йўқ. Бахмутда нима бўлаётганини аниқ тушунаман ва буларнинг барчаси нима учун қилинаётгани ҳаммага аён. Сизлар билан ҳарбийларимизнинг тактик қарашларини баҳам кўра олмайман, лекин оз қолгани ва ғалаба қозонишимизни тушунамиз.
Ҳозирда ҳарбийлар жуда муҳим вазифаларни бажармоқда, улар Бахмутда, қайси нуқталарда эканини айтолмайман, лекин бу Бахмут бугунги кунда Россия томонидан қўлга олинмаганини билдиради. Бунинг бошқача талқини бўлиши мумкин эмас”, — деди Зеленский.
Украина президенти шу тариқа Бахмут ҳақидаги баёнотига ойдинлик киритган.
Россия Бахмутни эгаллаганини иддао қилмоқда
20 май куни “Вагнер” асосчиси Евгений Пригожин Бахмут ўз бўлинмаларининг тўлиқ назорати остида эканини айтди. Кейинчалик, Россия Мудофаа вазирлиги “Артемовскни озод қилишнинг тугаши” (Бахмутнинг советча номи) ҳақида баёнот берди. Россия президенти Владимир Путин ёлланма аскарлар ва ҳарбийларни операция якунлангани билан табриклади.
Украина ҳарбийлари ва расмийлари шаҳарнинг Россия кучлари томонидан эгаллаб олинганини рад этди. Украина қуролли кучлари бош штаби шаҳар учун жанглар давом этаётганини таъкидлади.
Украина мудофаа вазири ўринбосари Анна Малярнинг айтишича, рус қўшинлари шаҳар атрофидаги ҳукмрон баландликларнинг бир қисмини йўқотган ва Украина қуролли кучлари Бахмутни ярим қуршовга олган.
Изоҳ (0)