Украина президенти Владимир Зеленский Россия қўшинлари Украина ҳудудида бўлса, урушни дипломатик йўл билан тугатиш имконияти йўқлигини айтди.
Японияда “Еттилик гуруҳи” (G7) саммити доирасидаги музокаралар чоғида президент Россияга дипломатик босим ўтказиш ҳақидаги энг муҳим тезис бу муаммони ҳал қилишда БМТ низоми ва халқаро ҳуқуқ нормаларини ҳурмат қилиш зарурати эканини айтди.
“Россия қўшинлари ҳудудий яхлитлигимиз, суверенитетимиз, қонунларимизни бузган ҳолда бизнинг ҳудудимизда бўлса, ҳеч қандай дипломатик йўлдан фойдаланиш имконияти йўқ. Россия қўшинлари Украина ҳудудида экан, улар билан ҳеч қандай музокара бўлмайди”, — деди Зеленский.
Шунингдек, у G7 етакчиларининг Украина тинчлик формуласини қўллаб-қувватлаётганидан ва Россия томонидан қўзғатилган кўплаб инқирозларни ҳал қилишдан мамнун эканини билдирди.
Зеленский G7 ва Украина саммитида нутқ сўзлади
Зеленский Украина иттифоқчи ва ҳамкорлар билан демократия, халқаро ҳуқуқ ва эркинлик ҳисобга олинишини таъминлайдиган ҳамкорлик даражасига эришганини айтди.
“Дунёда биз қадрлайдиган нарсаларни менсимаслик ва эътиборсиз қолдиришга уринишлар бўлди. Лекин ҳозир бунинг иложи йўқ. Энди бизнинг кучимиз ортиб бормоқда. Демократик давлатга агрессия қилишни истаган ҳар бир киши жавоб қандай бўлишини кўриб турибди. Сиз билан қанчалик кўп ҳамкорлик қилсак, дунёда бошқа бировнинг Россиянинг ақлдан озган йўлидан бориши эҳтимоли шунчалик кам бўлади. Аммо бу етарлими?”, — деди у.
Украина раҳбари демократияга кўпроқ нарса муҳтожлигини таъкидлади.
“Бизга демократиянинг аниқ глобал етакчилиги керак, деб ҳисоблайман. Бу биз ҳамкорликда тақдим этаётган асосий нарса”, — дея қўшимча қилди Зеленский.
Изоҳ (0)