Rossiya uzoq yillardan beri tahdid bo‘lib kelmoqda, shuning uchun Ukraina G‘arbdan xavfsizlik kafolatlari olishi kerak, dedi Avstriya tashqi ishlar vaziri Aleksandr Shallenberg Germaniyaning Die Welt gazetasiga bergan intervyusida.
Shu bilan birga, Avstriya diplomatiyasi rahbari hozirgi o‘n yillik yakuniga qadar Rossiyada siyosiy rahbariyat o‘zgarishi dargumon, degan fikrni bildirdi. “Rossiyadagi siyosiy tizim va siyosiy rahbariyat shu o‘n yillikning oxiriga qadar sezilarli darajada o‘zgaradi, deb o‘ylamayman. Rossiya bilan munosabatlarimizda bizga eng muhim kapital — ishonch yetishmaydi”, — dedi u.
Shallenberg qo‘shimcha qilishicha, “G'arb, shu jumladan Ukraina” kelgusida Rossiyaning turli kelishuvlarga rioya qilishiga ishona olmaydi.
Harbiy jinoyatlar sodir etgan shaxslarni javobgarlikka tortish haqida
Diplomatning so‘zlariga ko‘ra, G‘arb Ukrainada harbiy jinoyat sodir etgan rossiyaliklarni, shuningdek, “Rossiya siyosiy rahbariyatini harbiy jinoyatlar va bosqinchilik jinoyati uchun javobgarlikka tortishda” qat’iy bo‘lishi kerak.
Ayni paytda, Ukrainada davom etayotgan urush va Rossiyaga qarshi keng qamrovli sanksiyalarga qaramay, Avstriya hukumati Moskva bilan norasmiy kanallar orqali muloqot qilishda davom etmoqda, dedi u. “G‘arb Rossiya bilan gaplashishni davom ettirishi kerak, AQSH ma’muriyati ham. Zimmamizda global mas’uliyat bor. Rossiya dunyo xaritasidan o‘chgani yo‘q”, — dedi Shallenberg.
Izoh (0)