Ижодда тўғри тандемни танлаш муҳим аҳамиятга эга. Чунки ижодий лойиҳаларнинг муваффақиятли чиқиши кўп жиҳатдан шунга боғлиқ. Афсуски, энг яхши тандемлар орасида ҳамкорлиги узоққа чўзилмаган ижодкорлар жуда кўп. Келинг, уларнинг қисқа, аммо самарали ҳамкорлиги ҳақида суҳбатлашамиз.
“Афандининг қизлари” бирин-кетин тарқалди
Уч қиздан иборат жамоа 2020 йили карантин даври кучайган пайтда Нигора Абдуллахонова, Нигина Жабборова ва Муборак Абдуллаева иштирокида ташкил топганди.
.jpg)
Нигора Абдуллахонова сериалларда роллар ижро этар ва қатор кўрсатувларга бошловчилик қилган. Нигина Жабборова эса ўша пайтларда “Қадам” сериалидаги иштироки билан томошабинларнинг ёдида қолганди. Гуруҳдаги энг тажрибасиз актриса эса Муборак Абдуллаева бўлган. Аммо у шерикларини Instagram учун миллий контент қилишга кўндирган. Илк ролик шунчаки ҳазил учун суратга олинган.
Гуруҳни аввалига 2022 йилнинг июль ойида Нигина Жабборова тарк этганди. Муборак Абдуллаева “Дарё” мухбири билан бўлган суҳбатда Нигина Жабборова Москвадаги театрга ишга киргани сабабли жамоани тарк этганини маълум қилганди. Орадан тўрт ой ўтиб эса Муборак Абдуллаева “Афандининг қизлари” жамоаси тугатилгани ва барча қизлар алоҳида ижод қилишини маълум қилди. Аммо Нигора Абдуллахонова нега жамоани тарк этганига ойдинлик киритмади.
Фарҳод ва Ширин — 11 йиллик дуэтдошлар тарқалди
Фарҳод ва Ширин дуэти 2011 йилнинг 11 ноябрь санасида ташкил топган. Ўша пайтда ижодкорларнинг иккиси ҳам Ўзбекистон давлат консерваторияси талабалари эди.
2012 йил ижодкорлар учун омадли келди. Қисқа вақт мобайнида самарали ижод қилиб, 2015 йили яккахон концерт дастурларини тақдим этишди. Фарҳод ва Ширин фаолиятида шоир Бобур Бобомуроднинг катта ҳиссаси бор. У нафақат хонандаларни яхши шеър билан таъминлаган, балки ташкилий ишларида ҳам кўмаклашган. Афсуски, 2022 йили продюсер ва хонандалар ўртасида низо юзага келди ва шоир шеърлари асосида яратилган қўшиқларини куйлашни тақиқлади. Продюсер билан ҳамкорлик узилгач, орадан ҳеч қанча вақт ўтмай Ширин Зоитова Фарҳод билан ортиқ ҳамкорлик қилмаслигини маълум қилди.
— Фарҳод анчадан буён яккахон хонанда сифатида ижод қилишни хоҳларди. Икки ой олдин администраторимиз, мен ва Фарҳод ўтириб, гуруҳнинг келажаги ҳақида гаплашдик. Шундан кейин у Фарҳод ва Ширин дуэти учун ижод қилмаслигини, ўзи алоҳида хонанда сифатида куйлашини маълум қилди. Биз таклифни қабул қилдик, чунки бу унинг хоҳиши. Ҳеч қачон ҳеч кимни ҳеч нарсага мажбурлаб бўлмайди.
Шу билан ижодни тўхтатдик. Бир йилдан буён яхши ижод қилмаётган эдик. Мен жуда яхши нарсаларни қилишни, кўп нарсалар қилишни хоҳладим, лекин ҳаракатларим унча ўхшамагандан кейин фойдаси йўқлигини тушундим ва ўзимни ўзим тайёрлашга ҳаракат қилдим. Осонмас, 11 йиллик дуэт, Фарҳод эгизагимдек бўлиб қолганди. Қачондир барибир шу нарса бўларди, — дейди Ширин Зоитова.
Асал Зокирова санъатдан кетиб, оилани танлади
Виа Мароканд гуруҳи режиссёр ва актёр Жавлон Шодмонов томонидан 2015 йили ташкил этилган.
Жавлон Шодмонов қайнукаси Абдурашиднинг қўшиқ айтишига қизиққани сабаб унга дуэт тарзида ижод қилишни таклиф қилади. Кастинг ўтказиб, Асал Зокировани танлашади. Уларнинг қўшиқлари қанча кўп танқидларга сабаб бўлмасин, ҳазиломуз қўшиқларга ишланган клиплар YouTube тармоғида миллионлаб марта томоша қилинган. Афсуски, 8 йиллик ҳамкорликдан сўнг Асал Зокирова санъатдан кетишга қарор қилди. Унинг қарори мухлислар учун кутилмаган янгилик бўлди.
— Гуруҳга 8 йил меҳнатим кетди. Асал гуруҳдан уришиб кетгани йўқ, у шахсий ҳаётини қуриш мақсадида гуруҳни тарк этди. Мен ундан умуман хафа эмасман, ҳар бир инсон бахтли бўлишга ҳақли. У санъатни тарк этди, карьерасини тўхтатди. Битта нарсага қойил қолдим, у Instagram’даги 1 миллион 400 минг обуначиси бор саҳифасини ҳам Рашидга қолдириб кетди. Улар жуда кўп пул топишади, булардан кечиб кетиш эса мардлик. Биз бу лойиҳани тўхтатмоқчи эмасмиз. Асал кетишини айтганидан кейин ҳеч қаерга кастинг бермадик. Гуруҳимиз билан бу ишни давом эттириш ниятига келдик.
Бу ҳолат ўтган йили ҳам бўлган, бироқ Рашид кўндирганидан кейин Асал қолган. Гуруҳ очилганига 8 йил бўлган бўлса, Асал билан биринчи 3 йил учун контракт тузганмиз. Уч йил тугагандан кейин 5 йилга тузганмиз, бу контракт ҳам тугаганди, биз яна давом эттираётгандик”, — дейди Жавлон Шодмонов.
Озод Шукруллаев Мафтунадан осон воз кечди
Ижтимоий тармоқлардаги вайнлари билан танилган Озод ва Мафтуна жуфтлиги 2020 йили ташкил этилган.
Уларнинг танишувига Индира Мифтахова сабабчи бўлган. Мафтуна Шокированинг таъкидлашича, у Индира билан бирга “Қора атиргул” сериалида бирга суратга тушган. Суратга олиш жараёнида Мафтуна Шокированинг бир нечта шеваларда эркин сўзлашишини билган Индира Озод Шукруллаевга у билан ҳамкорлик қилишни таклиф этади.
2023 йилнинг апрель ойида ижодий ҳамкорларнинг айро ижод қилиши маълум бўлди. Бунга Озод Шукруллаев ойдинлик киритмади. Фақатгина Мафтуна Шокирова ҳамкорининг бошқа актриса билан вайнлар суратга олаётганини билиб шок ҳолатига тушганини маълум қилди.
Шаҳзод Султонов яна Зарина Йўлдошевани танлади
Актёр Шаҳзод Султонов икки йилга яқин вақт мобайнида актриса Феруза Норматова билан ҳамкорликда вайнлар суратга олди.
Мухлислар уларни бир-бирига мос жуфтлик эканлигини кўп бора эътироф этишганди. Шаҳзод Султонов бу актрисадан аввал Зарина Йўлдошева билан ҳамкорлик қилганди. Ўртадаги жиддий келишмовчилик сабаб уларнинг ижоди кўпга чўзилмаганди. Қарангки, Шаҳзод Султонов Феруза Норматова билан ҳамкорликни тўхтатганидан сўнг, аввалги партнёри Зарина Йўлдошева билан ижодни давом эттирди. Ҳозирги кунда улар янги вайнлар суратга олишмоқда. Феруза Норматова эса якка ҳолда ижод қилмоқда.
Изоҳ (0)