Ijodda to‘g‘ri tandemni tanlash muhim ahamiyatga ega. Chunki ijodiy loyihalarning muvaffaqiyatli chiqishi ko‘p jihatdan shunga bog‘liq. Afsuski, eng yaxshi tandemlar orasida hamkorligi uzoqqa cho‘zilmagan ijodkorlar juda ko‘p. Keling, ularning qisqa, ammo samarali hamkorligi haqida suhbatlashamiz.
“Afandining qizlari” birin-ketin tarqaldi
Uch qizdan iborat jamoa 2020-yili karantin davri kuchaygan paytda Nigora Abdullaxonova, Nigina Jabborova va Muborak Abdullayeva ishtirokida tashkil topgandi.
.jpg)
Nigora Abdullaxonova seriallarda rollar ijro etar va qator ko‘rsatuvlarga boshlovchilik qilgan. Nigina Jabborova esa o‘sha paytlarda “Qadam” serialidagi ishtiroki bilan tomoshabinlarning yodida qolgandi. Guruhdagi eng tajribasiz aktrisa esa Muborak Abdullayeva bo‘lgan. Ammo u sheriklarini Instagram uchun milliy kontent qilishga ko‘ndirgan. Ilk rolik shunchaki hazil uchun suratga olingan.
Guruhni avvaliga 2022-yilning iyul oyida Nigina Jabborova tark etgandi. Muborak Abdullayeva “Daryo” muxbiri bilan bo‘lgan suhbatda Nigina Jabborova Moskvadagi teatrga ishga kirgani sababli jamoani tark etganini ma’lum qilgandi. Oradan to‘rt oy o‘tib esa Muborak Abdullayeva “Afandining qizlari” jamoasi tugatilgani va barcha qizlar alohida ijod qilishini ma’lum qildi. Ammo Nigora Abdullaxonova nega jamoani tark etganiga oydinlik kiritmadi.
Farhod va Shirin — 11 yillik duetdoshlar tarqaldi
Farhod va Shirin dueti 2011-yilning 11-noyabr sanasida tashkil topgan. O‘sha paytda ijodkorlarning ikkisi ham O‘zbekiston davlat konservatoriyasi talabalari edi.
2012-yil ijodkorlar uchun omadli keldi. Qisqa vaqt mobaynida samarali ijod qilib, 2015-yili yakkaxon konsert dasturlarini taqdim etishdi. Farhod va Shirin faoliyatida shoir Bobur Bobomurodning katta hissasi bor. U nafaqat xonandalarni yaxshi she’r bilan ta’minlagan, balki tashkiliy ishlarida ham ko‘maklashgan. Afsuski, 2022-yili prodyuser va xonandalar o‘rtasida nizo yuzaga keldi va shoir she’rlari asosida yaratilgan qo‘shiqlarini kuylashni taqiqladi. Prodyuser bilan hamkorlik uzilgach, oradan hech qancha vaqt o‘tmay Shirin Zoitova Farhod bilan ortiq hamkorlik qilmasligini ma’lum qildi.
— Farhod anchadan buyon yakkaxon xonanda sifatida ijod qilishni xohlardi. Ikki oy oldin administratorimiz, men va Farhod o‘tirib, guruhning kelajagi haqida gaplashdik. Shundan keyin u Farhod va Shirin dueti uchun ijod qilmasligini, o‘zi alohida xonanda sifatida kuylashini ma’lum qildi. Biz taklifni qabul qildik, chunki bu uning xohishi. Hech qachon hech kimni hech narsaga majburlab bo‘lmaydi.
Shu bilan ijodni to‘xtatdik. Bir yildan buyon yaxshi ijod qilmayotgan edik. Men juda yaxshi narsalarni qilishni, ko‘p narsalar qilishni xohladim, lekin harakatlarim uncha o‘xshamagandan keyin foydasi yo‘qligini tushundim va o‘zimni o‘zim tayyorlashga harakat qildim. Osonmas, 11 yillik duet, Farhod egizagimdek bo‘lib qolgandi. Qachondir baribir shu narsa bo‘lardi, — deydi Shirin Zoitova.
Asal Zokirova san’atdan ketib, oilani tanladi
Via Marokand guruhi rejissor va aktyor Javlon Shodmonov tomonidan 2015-yili tashkil etilgan.
Javlon Shodmonov qaynukasi Abdurashidning qo‘shiq aytishiga qiziqqani sabab unga duet tarzida ijod qilishni taklif qiladi. Kasting o‘tkazib, Asal Zokirovani tanlashadi. Ularning qo‘shiqlari qancha ko‘p tanqidlarga sabab bo‘lmasin, hazilomuz qo‘shiqlarga ishlangan kliplar YouTube tarmog‘ida millionlab marta tomosha qilingan. Afsuski, 8 yillik hamkorlikdan so‘ng Asal Zokirova san’atdan ketishga qaror qildi. Uning qarori muxlislar uchun kutilmagan yangilik bo‘ldi.
— Guruhga 8 yil mehnatim ketdi. Asal guruhdan urishib ketgani yo‘q, u shaxsiy hayotini qurish maqsadida guruhni tark etdi. Men undan umuman xafa emasman, har bir inson baxtli bo‘lishga haqli. U san’atni tark etdi, karyerasini to‘xtatdi. Bitta narsaga qoyil qoldim, u Instagram’dagi 1 million 400 ming obunachisi bor sahifasini ham Rashidga qoldirib ketdi. Ular juda ko‘p pul topishadi, bulardan kechib ketish esa mardlik. Biz bu loyihani to‘xtatmoqchi emasmiz. Asal ketishini aytganidan keyin hech qayerga kasting bermadik. Guruhimiz bilan bu ishni davom ettirish niyatiga keldik.
Bu holat o‘tgan yili ham bo‘lgan, biroq Rashid ko‘ndirganidan keyin Asal qolgan. Guruh ochilganiga 8 yil bo‘lgan bo‘lsa, Asal bilan birinchi 3 yil uchun kontrakt tuzganmiz. Uch yil tugagandan keyin 5 yilga tuzganmiz, bu kontrakt ham tugagandi, biz yana davom ettirayotgandik”, — deydi Javlon Shodmonov.
Ozod Shukrullayev Maftunadan oson voz kechdi
Ijtimoiy tarmoqlardagi vaynlari bilan tanilgan Ozod va Maftuna juftligi 2020-yili tashkil etilgan.
Ularning tanishuviga Indira Miftaxova sababchi bo‘lgan. Maftuna Shokirovaning ta’kidlashicha, u Indira bilan birga “Qora atirgul” serialida birga suratga tushgan. Suratga olish jarayonida Maftuna Shokirovaning bir nechta shevalarda erkin so‘zlashishini bilgan Indira Ozod Shukrullayevga u bilan hamkorlik qilishni taklif etadi.
2023-yilning aprel oyida ijodiy hamkorlarning ayro ijod qilishi ma’lum bo‘ldi. Bunga Ozod Shukrullayev oydinlik kiritmadi. Faqatgina Maftuna Shokirova hamkorining boshqa aktrisa bilan vaynlar suratga olayotganini bilib shok holatiga tushganini ma’lum qildi.
Shahzod Sultonov yana Zarina Yo‘ldoshevani tanladi
Aktyor Shahzod Sultonov ikki yilga yaqin vaqt mobaynida aktrisa Feruza Normatova bilan hamkorlikda vaynlar suratga oldi.
Muxlislar ularni bir-biriga mos juftlik ekanligini ko‘p bora e’tirof etishgandi. Shahzod Sultonov bu aktrisadan avval Zarina Yo‘ldosheva bilan hamkorlik qilgandi. O‘rtadagi jiddiy kelishmovchilik sabab ularning ijodi ko‘pga cho‘zilmagandi. Qarangki, Shahzod Sultonov Feruza Normatova bilan hamkorlikni to‘xtatganidan so‘ng, avvalgi partnyori Zarina Yo‘ldosheva bilan ijodni davom ettirdi. Hozirgi kunda ular yangi vaynlar suratga olishmoqda. Feruza Normatova esa yakka holda ijod qilmoqda.
Izoh (0)