Qashqadaryo viloyatida iste’molga yaroqsiz go‘sht mahsulotlari muomalaga kiritilishining oldi olindi, deb xabar beradi viloyat IIB axborot xizmati.

Ma’lum qilinishicha, 10-may kuni soat 18:10 larda viloyat IIB Jamoat xavfsizligi patrul-post xizmati va jamoat tartibini saqlash boshqarmasi karantin bo‘linmasi hamda YHXB xodimlari “Umakay” muntazam YPX maskanida Qarshi—Toshkent yo‘nalishida harakatlanib kelgan Cobalt rusumli avtomashinani to‘xtatgan.

Avtomashina saloni va yukxonasi ko‘zdan kechirilganda, tegishli veterinariya hujjatlarisiz, kelib chiqishi nomaʼlum bo‘lgan 929 kilogramm go‘sht mahsulotlari borligi aniqlangan.

Go‘sht mahsulotlarining sifatini aniqlash maqsadida, Qashqadaryo viloyat hayvonlar kasalliklari tashxisi va oziq-ovqat mahsulotlari xavfsizligi davlat markazining laboratoriyasiga olib kelingan. Tekshiruvdan o‘tkazilganda isteʼmolga yaroqsizligi aniqlangan va tegishli tartibda yo‘q qilingan.

Iste’molga yaroqsiz go‘shtlar savdosi

Veterinariya va chorvachilikni rivojlantirish qo‘mitasi ma’lumotlariga ko‘ra, 2022-yilda 25,2 tonna go‘sht mahsulotlari va 21,2 tonna sut mahsulotlari iste’molga yaroqsiz deb topilib, o‘rnatilgan tartibda yo‘q qilingan.

Bundan oldinroq Navoiyda kelib chiqishi nomaʼlum 82 kg go‘sht olib ketayotgan haydovchi ushlangani, Jizzaxda 400 kilodan ziyod sifatsiz go‘sht yoqib yuborilgani, Gulistonda 250 kg isteʼmolga yaroqsiz go‘sht olib ketayotgan haydovchi ushlangani to‘g‘risida xabar berilgandi.