ДХХ Тошкентда қалбаки 100 минг долларни сотишга уринган тўрт кишини қўлга олди (видео)

ДХХ Тошкент шаҳрида қалбаки 100 минг АҚШ долларини сотишга уринган шахсларни қўлга олди, деб хабар беради ЎзА.

Қайд этилишича, Давлат хавфсизлик хизматининг Тошкент шаҳар бўйича бошқармаси ходимлари томонидан Бош прокуратура ҳузуридаги департамент билан ҳамкорликда Сергели туманида тезкор тадбир ўтказилган. Тадбирда 1974-1982 йиллар оралиғида туғилган 4 нафар фуқаро 100 минг қалбаки АҚШ долларини 70 минг долларга сотган вақтларида ашёвий далиллар билан ушланган.

Шунингдек, улардан бирининг яшаш хонадонидан ҳам 10 950 қалбаки АҚШ доллари тегишли тартибда расмийлаштириб олинган.

Ҳозирда ҳолат юзасидан мазкур шахсларга нисбатан Жиноят кодексининг 176-моддаси (Қалбаки пул, акциз маркаси ёки қимматли қоғозлар ясаш, уларни ўтказиш) 2-қисми “в” банди билан жиноят иши қўзғатилиб, тергов ҳаракатлари олиб борилмоқда

Қалбаки пуллар муомаласи

Апрель бошларида Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди. 

2022 йил ноябрида Наманган вилоятида қалбаки 8 300 долларни муомалага киритишга уринган шахс ушланган эди. Декабрда эса Наманганда МИБ идорасида қалбаки 10 000 доллар ёқиб юборилган