Европа тикланиш ва тараққиёт банки (ЕТТБ) Uzbekistan Airports АЖга Ўзбекистон халқаро аэропортларида аэропорт ускуналарини модернизация қилиш учун 28 миллион еврогача бўлган узоқ муддатли молиялаштиришни тақдим этади. Бу ҳақда компания матбуот хизмати хабар берди.
Қайд этилишича, ЕТТБнинг Самарқанд шаҳрида бўлиб ўтган йиллик форуми доирасида Uzbekistan Airports АЖ бошқаруви раиси Раъно Жўраева ва Евросиё бўйича инфратузилма департаменти директори Екатерина Мирошник мандат хатлари билан алишган.
“Банк маблағлари ҳисобидан йўловчи ташувчи автобуслар, юк ташувчи техникалар, лентали юк узатувчилар, самолёт буксирлари, самолётларни сув билан тўлдириш ва ҳожатхона бўлимларига хизмат кўрсатиш учун махсус автомашиналар, амбулатор автолифтлар, тозаловчи, муздан тозалаш машиналари ва бошқалар харид қилинади. Дастлабки ҳисоб-китобларга кўра, ЕТТБнинг молиялаштириши эвазига 76 дона янги аэропорт махсус техникалари харид қилинади”, — дейди Раъно Жўраева.
Бундан ташқари, ЕТТБ ва Uzbekistan Airports ўртасида 1 миллион евродан ортиқ грант маблағларини ажратиш бўйича келишувларга эришилган. Бунинг бир қисми сифатида банк асосий бизнес-жараёнларни оптималлаштириш ва шу орқали Uzbekistan Airports ва унинг таркибий бўлинмалари фаолияти самарадорлигини оширишга ёрдам берадиган халқаро консалтинг компаниясини жалб қилишни кўзда тутади.
Изоҳ (0)