Хитой Ташқи ишлар вазирлиги Пекиндаги халқаро ташкилотлар ва хорижий элчихоналардан ўз биноларининг фасадини “сиёсий пропаганда” учун ишлатмасликни сўради. Бу ҳақда Япониянинг Kyodo агентлиги Хитой пойтахтидаги “кўплаб дипломатик манбаларга” таяниб хабар берди. Нашрнинг қайд этишича, Хитой ТИВ, афтидан, Украина билан бирдамлик белгиси, биринчи навбатда, байроқлар, ёзувлар ва бошқа белгиларни назарда тутган.
Бундан ташқари, 10 майдаги билдиришномада Хитой расмийлари элчихоналар ва ташкилотларни “давлатлар ўртасидаги зиддиятларнинг олдини олиш” чораларини кўришга чақирган. Ҳужжатда, шунингдек, элчихоналар ва халқаро ташкилотлар “Хитой қонунлари ва қоидаларига риоя қилишга мажбур” экани, Хитой эса Дипломатик муносабатлар тўғрисидаги Вена конвенция сига мувофиқ уларнинг дипломатик иммунитетини ҳурмат қилиши таъкидланган.
Элчихоналарнинг бирортаси ҳам Украина билан бирдамлик белгиларини олиб ташламади
Хитой расмийларининг мурожаати Европа ва бошқа минтақалар дипломатларининг салбий муносабатига сабаб бўлди, уларнинг ҳеч бири белгиларни олиб ташламади, деб ёзади Kyodo. Нашрда сўзлари келтирилган европалик дипломатлардан бири Пекин позициясини танқид қилиб, муайян давлатнинг ўз позициясини билдиришига халақит берадиган асослар йўқлигини айтди.
Таъкидланганидек, Хитой пойтахтидаги кўплаб дипломатик миссиялар Россия босқинига қарши Украинани қўллаб-қувватлаш учун ўз биноларига Украина байроғи тасвири, хитой ва инглиз тилларидаги ёзувлар, хусусан, #StandWithUkraine хештегини ўрнатган. Бундай белгиларни биринчи навбатда, Канада, Германия ва Польша элчихоналарида кўриш мумкин.
Изоҳ (0)