Ўзбекистонда 2023 йилнинг ўтган даврида овқатдан заҳарланиш оқибатида 2 нафар бемор вафот этган. Бу ҳақда Санитария-эпидемиологик осойишталик ва жамоат саломатлиги қўмитаси хабар берди.
Маълум қилинишича, 2023 йилнинг ўтган даврига 21 та ҳолатда овқатдан заҳарланиш қайд этилиб, 107 нафар фуқаро жабрланган (уларнинг 22 нафари болалар), 2 нафар бемор вафот этган (уй шароитида тайёрланган консерва маҳсулотини истеъмол қилган).
Жами қайд этилган заҳарланишлардан 15 та ҳолатда уй шароитида тайёрланган консерва маҳсулотларини истеъмол қилиш оқибатида ботулизм касаллиги қайд этилиб, 52 нафар фуқаро жабрланган, шундан 8 нафарини болалар ташкил этади. 6 та ҳолатда “овқат токсикинфекцияси” қайд этилган бўлиб, 55 нафар фуқаро жабрланган бўлса, шулардан 11 нафарини болалар ташкил этган.
Иккита ҳолатда умумий овқатланиш шохобчаларида, яъни бир зумда тайёрланадиган лаваш, бургер ва шу каби тезпишар маҳсулотларни тайёрлаш жараёнида уларнинг технологиясига тўлиқ риоя этмагани, маҳсулотлар нотўғри сақлангани, қолаверса, ушбу маҳсулотларни тайёрлаш жараёнида маҳсулотларнинг бир-бирига мос келмаслиги оқибатида истеъмол қилган фуқаролар орасида ошқозон-ичак фаолиятининг бузилиши ва овқатдан заҳарланишга сабаб бўлган.
Овқатдан заҳарланиш ҳолатлари
Самарқанд вилояти Қўшработ туманида 6 январь куни 5 киши овқатдан заҳарланганди. Кўрсатилган тиббий ёрдамга қарамасдан, 24 ёшли Э.Ш. (эркак) 14 январь куни, 26 ёшли Э.Д. (аёл) 26 январь куни вафот этган.
Февраль охирларида эса Тошкент вилояти Оққўрғон туманида яшовчи оилада овқатдан оммавий равишда заҳарланиш ҳолати содир бўлганди. Воқеа жойида оиланинг 3 нафар аъзоси: 1961 йилда туғилган аёл, 1978 йилда туғилган эркак ва 1982 йилда туғилган аёл вафот этган. Шунингдек, ушбу хонадонда яшовчи 18 ёшли Р.М. касалхона жонлантириш бўлимида вафот этган.
Изоҳ (0)