Telegram’да аёлларнинг шаъни ва қадр-қимматини камситувчи видеоларни тарқатиб келган гуруҳ қўлга олинди

ИИВ Тезкор-қидирув департаменти Киберхавфсизлик маркази томонидан Telegram’да “Hello Tashkent, salam Tashkent” номли канал ва гуруҳларни ташкил этиб, уларга фуқароларнинг шаъни ва қадр-қимматини камситувчи видео тасвирларни жойлаштириб келган гуруҳ аниқланиб, қўлга олинди.

Мазкур гуруҳ ва канал бошқарувчилари жойланган тасвирларни ўчириш эвазига товламачилик йўли билан фуқаролардан пул талаб қилиб келган. Улар Telegram’даги очиқ гуруҳларга асосан қиз ва аёлларнинг фото ҳамда видеоларини жойлаб, қизиқувчиларни web-чатга таклиф қилган. Унга аъзо бўлиш эса 100 минг сўмдан 500 минг сўмгача этиб белгиланган.

Олиб борилган техник ва тезкор қидирув ишлари натижасида ушбу фаолият билан шуғулланиб келган гуруҳ қўлга олинди. ИИВ Тергов департаменти томонидан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилиб, гумонланувчиларга нисбатан қамоққа олиш тарзида эҳтиёт чораси қўлланилган.

“Hello Tashkent, salam Tashkent” гуруҳ ва каналларидан жабрланган фуқаролар 102 қисқа рақами ёки +998(99) 117-60-87 рақамлари орқали хабар беришлари сўралади.

Ўзбекистонда ўзганинг яланғоч фото ёки видеоларини тарқатиш билан қўрқитганлик учун жавобгарлик қандай?

Президент томонидан 11 апрель куни “Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун қабул қилинган.

Қонун билан интим ҳаёт дахлсизлигини бузганлик учун жиноий жавобгарлик белгиланган, яъни Жиноят кодекси қуйидаги мазмундаги 141-3-модда билан тўлдирилган:

“Шахснинг розилигисиз унинг танасининг ва (ёки) жинсий аъзоларининг яланғоч ҳолдаги фото ёки видеотасвирини ўз ичига олган маълумотларни тарқатиш, шу жумладан оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш ёки бундай маълумотларни тарқатиш билан қўрқитиш — базавий ҳисоблаш миқдорининг 400 бараваридан 600 бараваригача (120 миллион сўмдан 180 миллион сўмгача) миқдорда жарима ёки 360 соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.

Ўша ҳаракатлар:

а) такроран ёки хавфли рецидивист томонидан;

б) бир гуруҳ шахслар томонидан олдиндан тил бириктириб;

в) вояга етмаган шахсга нисбатан содир этилган бўлса.

360 соатдан 480 соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади”.