Рақобат муҳити бузилган бўлиши мумкин: 100 млн сўмлик тендерда Ирригация институти ва унинг ҳузурида ташкил этилган бошқа ОТМ қатнашди

Бухоро вилояти Олот тумани Аму-Бухоро машина канали бошқармаси 6—15 май кунлари илмий-тадқиқот ишларини амалга ошириш ҳужжатларини ишлаб чиқиш бўйича тендер ўтказди. “Дарё” мухбири лот маълумотларини кўздан кечириш жараёнида давлат хариди жараёнида ўзаро боғланган муассасалар иштирок этганини аниқлади.

Лотда машина каналининг Олот туман бошқармаси тасарруфидаги насос станцияларида кавитацияни ўлчаш ва назорат қилиш орқали электр энергия тежайдиган инновацион технология жорий этиш хизмати ўйналган. Тендернинг умумий бошланғич қиймати 100 миллион сўм этиб белгиланган.

Тендерни ютиш учун икки дона корхона рақобатлашган. Булар:

• Тошкент ирригация ва қишлоқ хўжалигини механизациялаш муҳандислари институти;
• Тошкент ирригация ва қишлоқ хўжалигини механизациялаш муҳандислари институтининг Бухоро табиий ресурсларни бошқариш институти.

Яъни бир олий таълим муассасаси ва ушбу ОТМ ҳузурида очилган бошқа бир институт бир тендерни ютиш учун “курашяпти”. Манфаатлар бир бўлган вазиятда рақобат муҳити бузилиши эҳтимоли бор.

Харид комиссиясининг якуний натижаларига кўра, тендерни 86.5 балл билан ТИҚХММИ ютиб олди. Шартнома суммаси 98 миллион сўм.

Масъуллардан ушбу шубҳали тендер натижаларига эътибор қаратишни сўраймиз.