Украина армияси қарши ҳужумга тайёрланиши фонида НАТО бош котиби ўринбосари Мирча Жоане Хитойни Кремлга ҳарбий ёрдам кўрсатишдан огоҳлантирди. Бу ҳақда “Америка овози” хабар берди.
“Биз ҳали Хитойнинг Россияга қурол етказиб бераётгани аломатларини кўрмадик, аммо бундай муҳокамалар давом этаётганидан хабардормиз”, — деди Жоан “Америка овози” билан суҳбатда.
У бу Хитойнинг жуда жиддий қарори бўлиши ва у нафақат НАТО, балки бутун дунё билан муносабатларига ҳам таъсир қилишини таъкидлади. Сиёсатчи Россия Украинадаги урушда агрессор эканини, унинг қуролланишини эса “қаттиқ қораланишини” билдирди.
Украинанинг НАТОга киришини қўллаб-қувватлаган Жоаненинг айтишича, Россия Украина ва Грузия каби давлатларнинг келажагига вето қўйиш ҳуқуқига эга бўлмаслиги керак.
“Хулоса шуки, Россия менинг мамлакатимга нисбатан қандай қарор қабул қилишимга иши бўлмаслиги керак. Мен қаерда ва қандай яшашимни ҳал қилиш менинг, халқимнинг ва сайланган раҳбаримнинг иши”, — дея тушунтирди у.
Майдони 17 миллион квадрат километрдан ортиқ бўлган Россия ҳеч қачон “НАТО томонидан қуршаб олинмайди”, — деди Жоане.
У Украинадаги фронт чизиғи “ҳаракатланаётгани”, НАТО Украина армияси Бахмутнинг ғарбий қисмидаги ҳудудларни қайтариб олиши аломатларини кўраётганини айтди.
“Украина муваффақиятли қарши ҳужумни бошлаш имкониятига эга, аммо Россия ҳам сезиларли қаршилик кўрсатиш қобилиятига эга эканини биламиз”, — деди НАТО бош котиби ўринбосари.
Изоҳ (0)