Ukraina armiyasi qarshi hujumga tayyorlanishi fonida NATO bosh kotibi o‘rinbosari Mircha Joane Xitoyni Kremlga harbiy yordam ko‘rsatishdan ogohlantirdi. Bu haqda “Amerika ovozi” xabar berdi.
“Biz hali Xitoyning Rossiyaga qurol yetkazib berayotgani alomatlarini ko‘rmadik, ammo bunday muhokamalar davom etayotganidan xabardormiz”, — dedi Joan “Amerika ovozi” bilan suhbatda.
U bu Xitoyning juda jiddiy qarori bo‘lishi va u nafaqat NATO, balki butun dunyo bilan munosabatlariga ham taʼsir qilishini taʼkidladi. Siyosatchi Rossiya Ukrainadagi urushda agressor ekanini, uning qurollanishini esa “qattiq qoralanishini” bildirdi.
Ukrainaning NATOga kirishini qo‘llab-quvvatlagan Joanening aytishicha, Rossiya Ukraina va Gruziya kabi davlatlarning kelajagiga veto qo‘yish huquqiga ega bo‘lmasligi kerak.
“Xulosa shuki, Rossiya mening mamlakatimga nisbatan qanday qaror qabul qilishimga ishi bo‘lmasligi kerak. Men qayerda va qanday yashashimni hal qilish mening, xalqimning va saylangan rahbarimning ishi”, — deya tushuntirdi u.
Maydoni 17 million kvadrat kilometrdan ortiq bo‘lgan Rossiya hech qachon “NATO tomonidan qurshab olinmaydi”, — dedi Joane.
U Ukrainadagi front chizig‘i “harakatlanayotgani”, NATO Ukraina armiyasi Baxmutning g‘arbiy qismidagi hududlarni qaytarib olishi alomatlarini ko‘rayotganini aytdi.
“Ukraina muvaffaqiyatli qarshi hujumni boshlash imkoniyatiga ega, ammo Rossiya ham sezilarli qarshilik ko‘rsatish qobiliyatiga ega ekanini bilamiz”, — dedi NATO bosh kotibi o‘rinbosari.
Izoh (0)