Беларусь президенти Александр Лукашенко 9 майдан кейин омма олдида кўринмади. Москвадаги ҳарбий парадда кўпчилик Лукашенконинг қўлидаги бинтга ва унинг саломатлигидаги ўзгаришларга эътибор қаратди. Омма олдида қанчалик кўп кўринмаса, Лукашенконинг қаердалиги ҳақида шунчалик кўпроқ саволлар туғилади.
“Зеркало” нашри журналисти оддий фуқаро ниқоби остида Беларусь президенти матбуот хизматига қўнғироқ қилиб, унинг қаердалиги ҳақида сўради.
Беларусь президенти администрациясига кўра, ҳозирда одатда фаол бўлган Лукашенко учун учрашувлар ва саёҳатлар жадвали йўқлигига қарамай, унинг иш гарафиги тиғиз. Сиёсатчи “ҳужжатлар билан ишлаши” қайд этилган.
Одатда сиёсатчининг барча хатти-ҳаракатларини батафсил ёритиб турувчи “ПУЛ Первого” Telegram каналида яқинда Мустақиллик саройи ёнида қуён акс этган кадрнинг чоп этилиши ёки савдо-сотиқ рекламалари нима сабабдан пайдо бўлгани сўралган. Беларусь президенти матбуот хизмати “ПУЛ Первого” аноним экани ва президент матбуот хизматининг унга алоқаси йўқлигини билдирган.
Журналист ҳам, бошқа беларусликлар ҳам Лукашенкони жамоат жойларида қачон кўриши мумкинлиги, унинг соғлиғи қандайлиги ҳақидаги саволга жавоб ололмаган. Сиёсатчининг спикерлари ҳам, унинг маъмурияти ҳам ҳеч қандай тафсилотни ошкор этмаяпти, фақат у билан “ҳаммаси яхши” экани, “миш-мишларга ишонмаслик” кераклиги таъкидланган.
Александр Лукашенконинг саломатлиги ҳақидаги саволлар у Москвадаги парадда 300 метр пиёда юра олмаганидан кейин пайдо бўлди. Россия президенти Владимир Путиннинг қўриқчилари уни машинада олиб юришга мажбур бўлди.
Бундан ташқари, Москвада Лукашенконинг қўли бинт билан ўралгани аниқланди, МДҲ давлатлари етакчилари учун ташкиллаштирилган тушликда ҳам иштирок этмади ва Минскка қайтиб кетди. Кечқурун Минскда сиёсатчи Ғалаба ҳайкали пойига гулчамбар қўйиш маросимида ўзининг анъанавий нутқини қилмади.
Изоҳ (0)