Беларусь президенти Александр Лукашенко 9 май куни Москвадаги парадда заҳарланган бўлиши мумкинлиги ҳақида миш-мишлар тарқалди. Бу ҳақда The Mirror хабар берди.
Лукашенко 9 майда Россия президентининг МДҲ давлатлари етакчилари учун ташкиллаштирилган тушликда иштирок этмагани эътиборга олинган. Беларусь президенти бошқа раҳбарлардан фарқли ўлароқ, Александр боғидаги номаълум аскар қабрига машинада борган. У қабр пойига гул қўйишга ҳам қийналган.
Беларуслик сиёсатшунос Дмитрий Болкунец Лукашенко заҳарланган бўлиши мумкинлигини илгари сурмоқда. Журналистлар Лукашенко Путиндан Александр боғига МДҲ етакчилари билан пиёда эмас, балки машинада кетишни сўрагани акс этган тасвирларга эътибор қаратди.
Беларусь президенти Россия хавфсизлик хизмати ходимидан уни номаълум аскарнинг қабрига олиб боришни сўраган бўлиши мумкин. Қизил майдондан боғгача тахминан 850 метрни ташкил қилади.
Нашрнинг қайд этишича, Путин ва бошқа етакчилар Лукашенкони кутган, кейин бирга гул қўйишга боришган.
“Беларусь раҳбари ташқи кўринишидан соғлом кўринадиган 70 ёшли Кремль раҳбарининг ёнида бир оз ўзини ноқулай тутди. Афтидан, унга бошқа раҳбарлар билан бирга эгилиб, номаълум аскар қабрига гул қўйиш қийин бўлган”, — дейилади хабарда.
Шундан сўнг Лукашенко Путин ташкиллаштирган норасмий тушликни ўтказиб юборган ва тез ёрдам машинаси ҳамроҳлигида Минскка қайтиш учун аэропортга йўл олган.
Бундан ташқари, журналистлар Беларусь президентининг ўнг қўлига бинт боғланганига эътибор қаратган.
Кремлнинг Лукашнеко тушликка келмаганига муносабати
Россия президенти матбуот котиби Дмитрий Песковга кўра, Лукашенко Минскда Ғалаба куни билан боғлиқ тадбирлар сабабли имкон қадар тезроқ кетишга мажбур бўлган. Песков Беларусь президентининг саломатлиги ҳақидаги саволга жавоб бермаган.
“Александр Григоревичнинг соғлиғи ҳақида нимадир дейишим ўта нотўғри бўлади”, — деган у.
Лукашенконинг матбуот хизмати сиёсатчининг Москвадан шошилинч равишда чиқиб кетишига изоҳ бермаган.
Изоҳ (0)