Уруш пайтида Россиянинг юқори мартабали амалдорларига истеъфога чиқиш тақиқланди, бунинг учун улар жиноий жавобгарликка тортилиши мумкин, деб ёзмоқда “Важние истории” нашри манбаларга таяниб.
Кремлда давлат амалдори лавозимини тарк этиш истаги хиёнат сифатида баҳоланади, шунинг учун давлат хизматчиларига “бирдамликни намойиш этиш” вазифаси юклатилган, дейилади нашр хабарида.
Шу билан бирга, нашр суҳбатдошларидан бири уруш бошланганидан кейин ишдан кетишни хоҳлаётган одамлар “кўп”лигини, аммо “ҳамма кетаверса, бошқарув йўқолишини” айтди. Ишдан бўшатишни тақиқлаш амалиётида истиснолар ҳам мавжуд, масалан, соғлиқ сабаб ёки коррупция билан боғлиқ ҳолатларда амалдорларга истеъфо берилади.
Шу билан бирга, Meduza нинг Россия президенти маъмуриятига яқин бўлган икки суҳбатдоши давлат хизматидан кетиш аксарият амалдорлар ва айниқса, губернаторлар учун урушдан олдин ҳам қийин бўлганини айтди. Мисол учун, 2021 йилда Оренбург губернатори Денис Паслер истеъфога чиқишни сўраган, аммо у ҳамон ўз лавозимида қолмоқда.
Россиянинг Украинага бостириб кириши ортидан юқори мартабали амалдорларнинг хорижга чиқиши чекланди. 2023 йил март ойида “Система” нашри Россия давлат компаниялари ва мансабдор шахсларининг айрим ходимларидан “загран” паспортларини топшириш сўралгани ҳақида хабар қилди. Апрель ойида The Bell хорижга чиқиш давлат аппарати ходимлари учун бутунлай ёпилганини ёзди. Нашрга кўра, Кремлда бундай чекловлар йўқ.
Изоҳ (0)