“Вагнер” хусусий ҳарбий кампанияси асосчиси Евгений Пригожин Киевга келишув таклиф қилди. Бу ҳақда Пентагоннинг сиздирилган махфий маълумотларига таяниб, The Washington Post хабар берди.
Таклифда Украина қўшинларини Бахмутдан олиб чиқиб кетиш эвазига Пригожин Украинага рус қўшинларининг жойлашуви ҳақидаги маълумотларни узатишга ваъда берган.
Ҳужжатларга кўра, Пригожин бу таклифни 2023 йил январь ойида Украина Мудофаа вазирлигининг Бош разведка бошқармасидаги танишлари орқали юборган ва улар билан уруш пайтида алоқада бўлган. Пригожин телефонда гаплашишдан ташқари, Африканинг маълум бир давлатида Украина қуролли кучлари вакиллари билан шахсан учрашган.
Пригожин рус қўшинларининг қайси позицияларни ошкор қилишни таклиф қилгани очиқланмаган.
Украинанинг икки амалдори аноним тарзда The Washington Post нашрига Пригожиннинг Украина қуролли кучлари билан “қайта-қайта” суҳбат ўтказганини тасдиқлади. Киев Бахмут ҳақидаги таклифга рози бўлмади (манбалардан бирига кўра, бу таклиф бир неча бор илгари сурилган), чунки улар “Вагнер” асосчисига ишонмайди. Вашингтон ҳам Пригожиннинг самимийлигига шубҳа қилмоқда, дейди америкалик расмий.
Украина президенти Владимир Зеленский 13 май куни The Washington Post газетасига берган интервьюсида Пригожин билан алоқаларни тасдиқламади ва тўғридан тўғри рад этди.
“Бу ҳарбий разведка масаласи”, — деди у.
Интервью эълон қилинганидан кўп ўтмай, газета ушбу парчани сайтдан олиб ташлади, бироқ Пригожиннинг январь ойидаги таклифига бағишланган мақола чоп этилгандан сўнг, у қайтарилди.
Февраль ва май ойларида Пригожин Россия Мудофаа вазирлигига қарши баёнотлар беришни бошлади ва вазирликни Бахмут яқинидаги “Вагнер” отрядлари учун снарядлар етказиб бермасликда айблади.
Россия президент маъмуриятига яқин манбалар бундай хатти-ҳаракат Пригожиннинг Россия президентига Бахмутни қўлга киритиш ҳақида берган шахсий ваъдаси билан боғлиқлигини айтди.
Meduza манбаларига кўра, давлат оммавий ахборот воситалари тарғиботчилари аллақачон Кремлдан Пригожин Россия Мудофаа вазирлигини танқид қилишда ва “фронтдаги муваффақиятсизликлар” ҳақида гапиришда давом этса, нашрларда уни “сотқин сифатида кўрсатиш” кераклиги ҳақида “огоҳлантириш” олган.
Шунингдек, Washington Post газетаси Россия Мудофаа вазирлиги Пригожинни ошкора танқид қилиш кампаниясини тайёрлаётганини, бироқ уни ташкил эта олмаганини даъво қилган.
Пригожин Зеленскийнинг интервьюси эълон қилинганидан сўнг, “Украина бош разведка бошқармаси бошлиғи Кирилл Буданов ёки Африкадаги бош разведка бошқармаси вакиллари билан учрашганини тасдиқлаш” ҳақидаги сўровга киноя билан жавоб қайтарган.
“Ҳа, албатта, мен бу маълумотни тасдиқлай оламан, бизнинг чет эл разведка хизматларидан яширадиган ҳеч нарсамиз йўқ: Буданов ва мен ҳали ҳам Африкадамиз. Washington Post ушбу маълумотни саҳҳифасидан олиб ташлаганига келсак, менимча, бу уларнинг ўз вақтида чипта сотиб олмагани билан боғлиқ.
Агар кимдир Washington Post ҳали ҳам Африкада эканини билиб қолса, уларга бизнес-класс учун юқори нархда билет сотишади. Шунинг учун улар одатдагидек пулни тежашни хоҳлайди”, — дея киноя қилган Пригожин.
Бахмут эвазига рус қўшинларининг позицияларини топшириш таклифи ҳақида янги мақола нашр этилгандан сўнг, “Вагнер” асосчиси яна бир кинояли изоҳ берган.
Унинг сўзларига кўра, журналистлар Буданов билан дўстона мулоқот қилаётганини тасдиқлаш учун “кўпроқ ишлашлари ва телефондан скриншот олиши керак”.
Изоҳ (0)