Андижонда ноқонуний майнинг ферма ташкил қилган шахс ушланди

Андижон шаҳрида майнинг крипто-активлари қурилмаларини ўрнатган шахс аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Андижон вилоят бошқармаси томонидан “Ўзэнергоинспекция” Андижон ҳудудий бўлими ходимлари билан ҳамкорликда тезкор тадбир ўтказилган. Тадбирда фуқаро Б.К. “А.” меҳмонхонаси ер тўласида 24 та тўпламдаги майнинг крипто-актив қурилмаларини ўзбошимчалик билан умумий фойдаланишдаги электр тармоғига улаб, жами 183,6 миллион сўмлик электр энергиясидан ноқонуний фойдалангани аниқланган.

Мазкур ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.

Ноқонуний майнинг фермалари

Бухорода давлатга 2,66 миллиард сўмлик зарар келтирган ноқонуний майнинг ферма аниқлангани, Нурафшонда майнинг крипто-активлари қурилмаларини ўрнатганлар ушлангани, Андижонда ноқонуний майнинг ферма ташкил қилган шахс қўлга олингани тўғрисида хабар берилганди.

2022 йил сентябрда Ўзбекистонда крипто-активлар айланмаси соҳасидаги фаолиятни амалга ошириш учун йиғимлар миқдорини белгилаш, уларни тўлаш ва тақсимлаш тартиби тўғрисидаги низом Адлия вазирлигида давлат рўйхатидан ўтказилган.

Низомга кўра, Ўзбекистонда майнинг ва крипто-активлар айланмаси соҳасидаги хизматлар провайдерлари фаолиятини амалга оширувчи юридик шахслар (майнер ва хизматлар провайдерлари) томонидан ушбу фаолиятни амалга ошириш учун йиғимлар тўланади.

Шунга кўра, йиғимлар майнинг фаолияти учун БҲМнинг 10 баравари (3 миллион сўм) миқдорда белгиланади.