Ўзбекистонда 2023/2024-ўқув йили учун тест синовлари ўтказиладиган 92 та ёпиқ иншоот танлаб олинди. Бу ҳақда Олий таълим, фан ва инновациялар вазирлиги матбуот хизмати хабар берди.
Қайд этилишича, олий таълим, фан ва инновациялар вазири Иброҳим Абдураҳмонов раҳбарлигида вазирлик ҳузуридаги Билим ва малакаларни баҳолаш агентлиги фаолиятидаги тизимли муаммолар ва уларнинг ечимларига бағишланган йиғилиш ўтказилган. Унда республика олий таълим муассасаларига ўқишга қабул қилиш бўйича тест синовларини ташкил қилиш юзасидан амалга оширилаётган ишлар муҳокама қилинган.
Маълумотларга кўра, 2023 йилнинг ўтган даври мобайнида жами 15 дан ортиқ турдаги тест синовлари ўтказилган ва уларда 140 минг нафардан ортиқ талабгор иштирок этган. Шунингдек, хорижий давлатларда олинган таълим тўғрисидаги ҳужжатларни тан олиш бўйича 1 180 нафар талабгорнинг таълим ҳужжатлари кўриб чиқилган, таълим соҳаси ташкилотлари томонидан берилган 5 510 та расмий ҳужжатга апостил қўйилган.
Тест синовларини ўтказишга мўлжалланган алоҳида биноларнинг мавжуд эмаслиги сабабли ўтказилаётган аксарият тест синовлари таълим муассасалари ўқув биноларида таълим жараёнига халақит қилмаслик учун ҳафтанинг дам олиш (шанба ва якшанба) кунларида ўтказилмоқда.
Йиғилишда, шунингдек, агентлик фаолиятига доир ўз ечимини кутаётган масалалар, хусусан, жойларда тест синовларини йил давомида ўтказиш учун катта сиғимли биноларни қуришдаги айрим камчиликлар қайд этилиб, уларни бартараф этиш чоралари бўйича таклифлар берилган. Мутасаддиларга оптик сканер ва уларга эҳтиёт қисмлар харид қилишни тезлаштириш топширилган.
2023/2024-ўқув йили учун тест синовлари ўтказиладиган 92 та ёпиқ иншоот танлаб олинган ҳамда уларнинг режа чизмалари тайёрланиб, маҳаллий ҳокимлик ва идоралар билан келишилган ҳолда тасдиқланган.
Бундан ташқари, тест синовлари ўтказиладиган 15 та умумтаълим фанидан 26 520 та ва қардош (қозоқ, қирғиз, тожик, туркман) тиллардан 2 400 та тест топшириғи шакллантирилган ва экспертизадан ўтказилган. Кенг жамоатчилик орасидан тест синовларида гуруҳ назоратчилигига номзод сифатида рўйхатдан ўтган 8 956 нафар талабгордан 4 000 нафарга яқини саралаб олинди ва улар билан шартномалар расмийлаштирилмоқда.
Стадионларда ўтказилган тест синовлари
2020/2021-ўқув йили учун олий таълим муассасаларининг бакалавриат таълим йўналишларига кириш тест синовлари очиқ майдонларда ташкил этилганди. Шу сабабли ўшанда абитуриентлар хоҳишига кўра тест синовларига бош кийим (кепка) билан келишлари мумкинлигини билдирилган. 2 сентябрда Фарғонада имтиҳонга келган абитуриентларга дўппи тарқатилганди.
2021 йилнинг август ойи бошида Ўзбекистон Давлат тест марказининг расмий веб-сайтига 2021/2022-ўқув йили учун олий таълим муассасаларининг бакалавриат таълим йўналишларига кириш тест синовлари ўтказиладиган стадион ва хиёбонлар бўйича маълумотлар эълон қилинганди. Хусусан, Тошкент шаҳрида ОТМларга кириш имтиҳонлари “Пахтакор” ва “Бунёдкор” стадионлари, шунингдек, “Ғалаба” ва “Ботаника” боғларида бўлиб ўтганди. 2022 йилда ҳам ОТМларга кириш имтиҳонлари очиқ ҳавода ўтказилди.
Изоҳ (0)