Фарғонада давлатга 1,8 млрд сўмлик зарар келтирган ноқонуний майнинг ферма аниқланди

Бош прокуратура ҳузуридаги департамент томонидан Фарғона вилоятидаги ноқонуний майнинг фермалар аниқланди.

Департаментнинг Ўзбекистон туман бўлими томонидан вилоят ЭТК ходимлари билан ҳамкорликда ўтказилган терговга қадар текширувда, «К.а.» МЧЖ раҳбари М.А. корхонанинг Учкўприк туманидаги ёрдамчи хўжалигида гўёки компьютер техникаларини таъмирлаш цехини ташкил этиб, амалда 179 дона «Антминер» майнинг қурилмаларини ўзбошимчалик билан умумий фойдаланишдаги электр тармоғига улаб, 794,7 минг кВт/с электр энергиясидан ноқонуний фойдаланиб, давлат ва жамият манфаатларига 1,8 миллиард сўм зарар етказгани аниқланган.

Шу каби департаментнинг Қўқон шаҳар бўлими томонидан вилоят ДХХ ва ЭТК ходимлари билан ҳамкорликда ўтказилган терговга қадар текширувда, фуқаро С.С. Ўрикзор кўчасидаги уйида гўёки музлаткичларни таъмирлаш цехи ташкил этиб, амалда 6 дона «Антминер» майнинг қурилмаларини ўзбошимчалик билан умумий фойдаланишдаги электр тармоғига улаб, 126,1 минг кВт/с электр энергиясидан ноқонуний фойдаланиб, давлат ва жамият манфаатларига 283,8 миллион сўм зарар етказгани аниқланган.

Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.

Мавзуга доир: 

• Бухорода давлатга 2,5 млрд сўм зарар етказган майнинг ферманинг ноқонуний фаолиятига чек қўйилди
• Андижонда йирик майнинг ферма аниқланди. У давлат ва жамиятга 40,4 млрд сўм зарар етказган