Украина Қуролли кучлари қарши ҳужумни режалаштираётгани сабаб Киев ва Москва можарони тинч йўл билан ҳал этиш имконияти орқа планга ўтиб қолди. Бироқ Америка ва Европадаги айрим амалдорлар жанговар ҳаракатларнинг кейинги фазаси дипломатияни “жонлантириши” мумкин деб ҳисобламоқда. Бу ҳақда The New York Times газетаси хабар берди.
Таъкидланишича, АҚШ ҳукумати ўт очишни тўхтатиш ёки тинчлик музокараларини бошлашга олдингидек эҳтиёткор. Европалик айрим амалдорлар ҳам бунга шубҳа билан қарамоқда. Украина расмийлари Россия қўшинлари чиқиб кетмагунча музокараларга рози бўлмаслигини маълум қилган; Россия томони ҳам “бирор ёнбосиш ёки диалог ўрнатиш аломатларини намоён этмаяпти”.
Шунга қарамай америкалик амалдорларнинг сўзларига кўра, АҚШ президенти Жо Байденнинг ёрдамчилари музокаралар имкониятини истисно этмаяпти ва ҳам Киев, ҳам Москва учун манфаатли бўладиган якунни аниқлашга уринмоқда. Байденнинг ёрдамчилари ва европалик амалдорлар, айниқса, Украина қарши ҳужумда сезиларли муваффақиятга эришишига умид қиляпти.
“Администрациянинг юқори мартабали вакиллари украиналик ҳамкасбларимиз билан охир-оқибат дунё қандай кўринишда бўлиши тўғрисида мунтазам суҳбатлар ўтказаётганини биламан”, — дейди демократ Адам Смит. Шу билан бирга, Вашингтон ва Киев мунтазам “Украина Қуролли кучларини қуроллантириш ва унга кўпроқ ҳудудларни қайтариб олишига ёрдам бериш” бўйича мулоқот қилмоқда.
АҚШ Қуролли кучлари Штаб бошлиқлари қўмитаси раиси генерал Марк Милли ҳам тинчлик музокаралари кераклигини қайд этган, можаронинг узоқ давом этиши кўплаб қурбонликларга олиб келади. Давлат котиби Энтони Блинкен эса бошқача позицияни эгаллаган. Май бошида у диалог учун “Путин ва Россия онгида чуқур ўзгариш содир бўлиши” кераклигини айтганди.
Россия ТИВ раҳбари Сергей Лавров Украина қўшинларининг муваффақиятли қарши ҳужумидан кейин Киев ва Москвани музокаралар бошлашига оид нуқтаи назарни “шизофреник” деб атаган.
Куни кеча “Вагнер” хусусий ҳарбий кампанияси асосчиси Евгений Пригожин Бахмут йўналишидаги “тактик” чекинишни очиқ тан олиб, “Россия учун глобал фожиа” муқаррарлигини айтди. Шунингдек, у Россия мудофаа вазири Сергей Шойгуни охирги ойларда фронт чизиғининг энг қақшатқич жанглари давом этаётган Бахмут шаҳрига келишга чақирганди.
Изоҳ (0)