Туркия президенти Ражаб Тоййиб Эрдўғон Олти мухолифатчи партияси альянсидан (Халқ альянси) президентликка номзод Камол Қиличдарўғлининг Россия ҳақидаги баёнотини қоралади. Бу ҳақда Anadolu хабар берди.
Ражаб Тоййиб Эрдўғон сайловдаги асосий рақибининг баёнотини “уятли” деб баҳолади.
“Энди жаноб Камол Россияни ғашини келтиришни бошлади. У Туркиядаги сайловларга Россия бошчилик қиляпти, дейди. Сенга уят эмасми? Уялгин. Агар Америка, Германия, Франция ёки Британия сайлов жараёнига аралашяпти десам, қандай реакция билдирган бўлардинг?”, — дейди Эрдўғон.
У хорижий давлатлар билан алоқа қилишда 20 йиллик тажрибага эгалиги, уларнинг асл ниятларини яхши билишини таъкидлади. Эрдўғон бир қатор Ғарб ОАВларининг амалдаги ҳукумат мухолифларини қўллаб-қувватловчи нашрларига эътибор қаратди.
Туркия етакчисига кўра, Қиличдаўғли ва унга ўхшаганларнинг баёнотлари мамлакат тараққиётини тўхтатиш ва “Туркиянинг 100 йиллиги” концепцияси мақсадларига эришишга тўсқинлик қилмоқчи.
Туркияда президентлик ва парламент сайловлари 14 майга белгиланган. Президентликка номзодларнинг ҳеч бири 50 фоиз овоз ололмаса, иккинчи тур 28 май куни бўлиб ўтади.
Камол Қиличдарўғлининг Россия ҳақидаги баёноти
Камол Қиличдарўғли Россияни фитнада айблаб, “Туркия давлатидан қўлини тортишни” талаб қилди. У Туркияда фош этилган монтажлар, фитналар, Deep Fakе контенти ва ёзувлар ортида Россия турганини айтди.
“15 майдан кейин ҳам дўстлигимизни давом эттирмоқчи бўлсангиз, қўлингизни Туркиядан узоқ тутинг. Биз ҳамкорлик ва дўстликни қўллаб-қувватлашда давом этамиз”, — деди у.
Кремлнинг муносабати
Россия президенти матбуот котиби Дмитрий Песков Кремль Туркиядаги президентлик сайловларига аралашганини рад этди. У Россия бошқа давлатларнинг “ички ишлари ва сайлов жараёнларига аралашмаслиги” ва Туркия билан муносабатларни қадрлашини таъкидлади.
“Биз расман шуни эълон қиламизки, ҳеч қандай аралашув ҳақида гап бўлиши мумкин эмас. Агар кимдир жаноб Қиличдарўғлига шундай маълумот берган бўлса, улар ёлғончидир”, — деган у.
Изоҳ (0)